Williams-i AFI Lifetime achievement sempet agizük

Los Angeles, June 10 (Agencies): Brehostibar nü Hollywood nung nüngtugu nisungtem – Steven Speilberg, Harrison Ford aser J.J. Abrams nungeri Hollywood nung yangluba film-tem nung amshiba music composer, John Williams tushiogo.

‘Star Wars’, ‘Jurassic Park’, ‘Indiana Jones’, ‘Harry Potter’ aser ‘Jaws’ na densema, Hollywood nung otsüsütsüsa yangluba tongti film-tem nung amshitsü asoshi music compose asüsang, arishi küm 84 tain Williams-i American Film Institute (AFI)-i ayongba sentong nung Lifetime achievement sempet agizüka liasü.

“Ni asüng nungi tenzüka mapa inyakdang tan kü nem agütsüba sempet ya agizüktsü temsütsüsa inyaktsü nangzüker,” ta Williams-ia sempet agizükdang lemsatep.

Alima ajunga nung Williams ya AFI-i agütsüba Lifetime achievement sempet agizüker mezüngbuba composer akümer lir.

New York nung tentetba Julliard school nungi graduate asüsang, Williams-i tanü tashi nung film nung amshiba kenten score 150 dak tema compose süa lir.

Küm 70 shi tejaklen nungi tenzüka Hollywood nung tetsüng ajemokba sülen tanü tashi nung Williams tenüng Oscar sempet agütsütsü atema 50 tashi benok aser Oscar sempetji asangsang nung 5 ben tashi agizüka lir.

Williams jakdang, Spielberg, Hanks, Alfred Hitchcock, Elizabeth Taylor, Jane Fonda aser Steve Martin nungeria AFI’er Lifetime achievement sempet agizüka lir.