Williamson-i Sir Richard Hadlee Medal agizük

Metsüremi/March 21, 2019 (Agencies): Brehostibarnü Auckland nung New Zealand pur asayar rongnungi Sir Richard Hadlee Medal asemben tashi angur rongnung Kane Williamson mezüngbuba kümogo. Kasa mapang nung tetsür all-rounder Amelia Kerr nem tetsürtem rongnungi player-of-the-year award agütsüogo.
Williamson-i, Ross Taylor ajateta otsü tasen ka yangluogo shibai iba award anaben agizüka lir. Trent Boult aser Brendon McCullum nati iba award khen khen kokteta lir. Iba award ya 2010-11 küm benok aser asayar kati küm tepeyong formate asemprongla nung asayaba asadanger best player of the year award agütsür.
Williamson lenisüba kübok New Zealand puri Test series pongu atonga kokogo. Parnoki West Indies, SriLanka, England, Pakistan aser Bangladesh akok. Maneni pa New Zealand asayartem rongnungi mezüngbubaTest century 20 yanglusang kümogo aser ibayongji Test player of the year award-a pa nem agütsü. Pai 2018 küm tetenzük nungi Test asaya teku nung run 925, ODI 21 nung run 838 aser T20I asaya 15 nung run 332 yanglu.
Kasa mapang nung arishi küm 18 tain Kerr nem women’s ODI player of the year award agütsüogo. Lai run 415 yanglu aser iba nung Ireland den asayaba mapang out mesüi run 232 yangluba densema lir. Kasa asaya nung lai wicket 5 out süja liasü. Kerr nemsa women’s domestic bowling atema Phyl Blackler Cup aser Williamson aser fast bowler Trent Boult na nem first-class batting aser bowling award agüja liasü.
New Zealand nungi asyar rongnung run timtiba yanglur alisang Ross Taylor (run 8026) nem ODI Player of the Year award agütsü aser Colin Munro nem T20I Player of the Year award agütsü. 2018 küm tetenzük nungi Taylor-i run 1232 yanglu aser New Zealand nungi asayartem rongnung ODI Century 20 yangluba mezüngbuba asayar aküm. taoba küm Blackcaps pur rongnungi T20I nung Munro-i run (634) timba yanglu. Pai iba mapang tsüngda century ka aser half century pongu yanglua liasü.
Sophie Devine shibai T20I asaya 19 nung run 626 yanglu aser wicket 21 agia liasü la nem Women’s T20I player of the year award agütsü.
Chris Brown nem umpire of the year award agütsü. Award agütsüba sentong nung taoba hopta Christchurch nung khasetertem nem tetushi agütsüba sentonga ka agia liasü.