Williamson N Zealand Captain tasenba akümer

Wellington, April 28 (Agencies): Kane Williamson-i taoba captain, Brendon McCullum melenzüka cricket asayatsü shilem asemprongla indang New Zealand captain tasenba tanü, Brehostibar nü kümogo.
Williamson-i captain asangsang nung akümba jakdanga par N Zealand telok captain ama, One-Day Internationals (ODIs) aser Twenty20 (T20) asayamong aika nung shilem agiba osang bushitetogo.
“Williamson-i asangsang nung captain menden benokba jakdang pa dak lenisütsü sempet aliba kuli jenti nguogo,” ta N Zealand Cricket (NZC) nung Chief Executive, David White-ia metetdaktsü.
“Williamson ya külem asayartem dang masü saka alima ajungai aküm agütsüba asayar aser lenir tajung ka lir,” ta pai shisem.
“Kü nem N Zealand telok captain akümtsü maongka agütsüba atema kanga pelar. McCullum lenisüba kübok takok anguba ama, kü lenisüba küboka ozü N Zealand teloki takok jenti angutsü merangtsü,” ta tang India nung ayonga asayaba cricket asayarmong, Indian Premier League (IPL) nung shilem agia alisang, Williamson-ia metetdaktsü.
Williamson lenisüba kübok par N Zealand teloki T20 asayamong semifinal nung 2 ben tashi shilem agitsü maongka anguba osanga bushiteta lir.
Test, ODI aser T20 densemba cricket asaya shilem asemprongla nung ajak agi runs 2,696 tashi yaküm, 2015 küm yangluba nüngtem nung Williamson nem Wisden Almanack’s Leading Cricketer in the World sempeta tan April ita tetenzüklen agüja liasü.