Wimbledon 2017: Novak Djokovic tanabuba round tongogo

London, July 04 (Agencies): 2017 Wimbledon asayamong tebur kija tennis asaya mezüng round nung Novak Djokovic aser Martin Klizan tsüngda Mongulbarnü asayadang Martin yiruba ajanga set ka dang asayatetba yong Serbia nunger Djokovic-i takok angu.
Wimbledon takok marok asemben bena alisang, Djokovic-i mezüng set nung 6-3 agi Klizan madak takok ngur lia Slovakia nungba tetsüng yirua aliba anepaludaktsütsüsa aküm.
World No. 47, Klizan-i tanabuba set asayatsü asoshi kanga merang saka pa yiruba ajanga masayatettsüsa aküm aser umpire dangi oa pai masayatettsü, ta ashi.
World No. 2, Djokovic ya grand slam 13 buba akoktsü asoshi nükjidong tulu nung asaya tenzükogo aser pai taruba round nung Czech Republic nunger Adam Pavlasek den asayatsü.
Kasa asayamong nung tetsür kija tennis asayar, Mandy Minella tsükogo. Arishi küm 31 tain, Minella ya ita pezü-ser tesadang mashisa liaka lai iba asayamong nung shilem agi. Italy tsür, Francesca Schiavone-i Minella ya 6-1, 6-1 agi tsükdaktsü.
“Taküm season atema Wimbledon ya ni asoshi tatembang asütsü,” ta taküm küm tatemlen tanur asotsü alila, Minella-i osangbener dang ashi.
Minella ya tetsürtem tarep asaya nung Latvia tsür, Anastasija Sevastova den külemi asayatsü lir.
Taoba küm Wimbledon takok marok abenla, Serena Williams-a mashisa aliba ajanga taküm iba asayamong nung shilem magir. Lar tanur mezüngbuba ya September ita asotsü lir.