Wimbledon 2017: Williams aser Muguruza tsüngda final asayatsü

London, July 13 (Agencies): Wimbledon asayamong nung Venus Williams-i otsü tasen ka Brehostibarnü yanglua küm 23 tsüngda iba asayamong final nung tetsürtem kija tennis asayar tantsütila kümogo. Brehostibarnü Wimbledon asayamong tetsürtem kija asaya America tsür, Venus Williams aser Johanna Konta tsüngda semi-final asayaba nung Williams-i 6-4, 6-2 agi takok angu.
Williams-i iba asayamong mezüngbuba asayar taküm agi küm metsü jungogo aser lai iba asaya ponguben koka lir aser final tokoben asaya lir.
All England Club asayamong nung lai 2009 küm final asayaba sülen taküm ya mezüngbuba asayatsü lir.
Konta ya iba asayamong nung küm 40 buba nung mezüngbuba British tsür final asayatsü asoshi otsü yanglutsü liasü, saka iba otsü meyanglujungi arishi küm 37 tain, Williams-i tsükdaktsüogo.
Williams-i final nung Spain tsür, Garbine Muguruza den asayatsü.
“Yangi ni aiben final asayaogo. Aser itemji temoatsü liasü. Ni tali memeshitettsü, saka ni tera meshitsü. Takok ka tali ngutetra jangratemtsü asütsü,” ta Venus-i asaya temer osangbener den jembidang ashi.
Deobarnü final asayaba nung World No. 11, Venus-i takok ngura, Wimbledon indang Open era nung la ya champion tantsütila akümtsü aser lai Grand Slam takok marok ti buba abentsü.
Tanü asaya nung takok anguba ajanga tenu Serena-i yanglua aliba otsü yanglushija Wimbledon asaya 87ben buba kokogo.
2016 French Open champion, Garbine Muguruza-i küm asem tsüngda nung Wimbledon final-i anabenbuba itetogo. Lai Magdalena Rybarikova madak semi-final nung 6-1, 6-1 agi takok angu.
Arishi küm 23 tain, Magdalena ya 2015 Wimbledon final nung Serena Williams-i tsükdaktsü aser la ya Grand Slam final asembuba asayatsü lir.
Kasa asayamong teburtem kija asaya nung Roger Federer semi-final-i iogo. Roger Federer-i iba asayamong tenetben tashi koka lir aser semi-final 11-ben asaya lir. Federer-i Milos Raonic madak 6-4, 6-2, 7-6 (7/4) agi takok ngua semi-final tongtet.
Arishi küm 35 tain, Federer-i All England Club nung asaya 100buba ya Tomas Berdych den asayatsü.
Quarter nung Novak Djokovic aser Berdych asayadang 7-6 (7/2), 2-0 agi Djokovic points timba liasü, saka pa tekettsü yiruba ajanga asaya metemjungi anentsüsa aküm aser Berdych ya semi-final tongtet.
1974 küm Ken Rosewall arishi küm 39 tain asüdang iba asayamong nung tanabuba jenjang ngutetba sülen semi-final nung asayar tambuti rongnung Federer ya tanabuba jenjang nung lir.