Wimbledon: Serena-i tetsür singles takok marok agizükogo

Wimbledon: Serena-i tetsür singles takok marok agizükogo

America tsür, Serena Williams-i Germany tsür, Angelique Kerber madak final asaya akokba sülen 2016 Wimbledon tetsür singles takok marok amer menürema agiba noksa ka yangi angur. (London, July 09)

London, July 09 (Agencies): Defending champion, Serena Williams-i final asaya koka 2016 Wimbledon asayamong tetsür singles takok marok tanü, Honibar nü agizükogo.
America tsürla, Serena-i tan takok marok agizükba sülen Germany tsür, Steffi Graf-i Open yimya nung tennis asayatsü tenzükba sülen grand slam takok marok 22 agizükba otsüa menepogo.
Tan asayamong nung temaba jenjang nung alir, Serena-i tanü points 7-5, 6-3 ngua Germany tsür, Angelique Kerber final asaya nung tsükdaktsü.
Serena-i yaküm, 2015 küm asayaba Wimbledon takok marok agizükba sülen grand slam takok marok 21 agizüker tetsür asayar aküm saka iba sülen lai grand slam takok marok ka danga magizükteti küm 1 tashi süidaktsü.
Tanü asaya nung Kerber-i kanga meranga asaya saka Serena-i winner 39 aser ace 13 tashi yanglua kangasa junga asayaba yong Serena-i tanü final asayaji minute 39 shi nung kokadok.
“Tanü takok anguba atema kanga pelar. Tetsür World No. 22, Kerber den asayadang ni tennis tajungtiba asayatetter,” ta Serena-i tesülen metetdaktsü.
“Serena, nai takok marokji agizüktsü ajangzükogo. Na ya champion aser nisung takotet ka lir,” ta Kerber-ia Serena den lemsatepa liasü.
Tan takok anguba ya Serena-i taküm January ita asayaba Australian Open final nung Kerber-i tamakok ajurudaktsüba kepzüker lir.
Arishi küm 34 tain, Serena-i tan takok marok agizükba den külemi, senpet sena euro sen million 2 tashi agizüka liasü.
Tan agi singles takok marok 71 buba agizüka, taoba champion, Czech Republic tsür, Martina Navratilova-i yangluba Wimbledon takok marok 73 agizükba otsü takok marok 2 agi memenepla, Serena-i maneni grand slam takok marok agizüka, Australia tsür, Margaret Court-i tesüiba mapang yangluba grand slam takok marok 24 tashi agizükba otsü meneptsü alizüng ayu tenzükogo.

You must be logged in to post a comment Login