Wimbledon: Takok angur nem Pound sen mn 2 agütsütsü

London, April 27 (Agencies): Taküm, 2016 küm asayatsü ayongba Wimbledon tennis asayamong nung takok marok agizüker tetsür aser tebur asayar naprongla nem pound sen million 2 senpet agütsütsü renemba osang ka All England Lawn Tennis Club (AELTC)-i tanü, Bodbar nü metetdaktsüogo.
Taoba mapang agütsüba senpet sen noklang nung shilem 5 agi taküm timba küma ajungkettsüba sülen iba asayamong nung takok angur ajunga nem ajak agi pound sen million 28.1 agütsütsü renema lir.
Yaküm ayongba Wimbledon asayamong nung tebur aser tetsür singles takok marok agizüker, Novak Djokovic aser Serena Williams naprongla nem senpet sen pound sen million 1.88 agüja liasü.
Tan senpet sen timba küma ajungkettsü aka, Grand Slam asayamong rong nung US Open takok marok agizüker nem senpet sen timba agütsüba osang bushiteta lir.
Ano külen, tesüiba champion, Russia tsür, Maria Sharapova-i ozüng alema meldonium mozü achi ta yimjak nung nangzükba sülen taküm Wimbledon asayamong nung ozüng alema mozümora achiba tetendangbaren kanga sashia agitsü renemba osanga angazükogo.
130 buba Wimbledon Championships London southwest tsütsülen,  All England Club nung taküm June ita 27 nü nungi July ita 10 tashi asayatsü ayonga lir.