Wipro-i matamabensartem nem marathon ayongzüka sen aatsü

Bengaluru, September 20 (Agencies):Alima nung software yangluteter tulutiba rongnung ka, Wipro Ltd-i Deobar nü alima ajak nung marathon ayongzüka matamabensartem nem sen aatsüogo, ta company sangdong ka ajanga metetdaktsü.
“Iba sentong ya ‘Run with a purpose’ omen nung ajemdaker alima nung yimti 109 nung kaogo. Linük ajunga senteper iba marathon asemtepba nung shilem agir ajak agi nisung 68,000 liasü aser India nunga yimti 16 nung kasa sentong agiogo,” ta IT rongnung tanishir, Wipro sangdong ajangasa ashi.
Bengaluru nung electronics city tesem nung 10buba marathon ‘Spirit of Wipro Run 2015’ omen nung ajemdaker ayongba asemtepba nung company nung inyakertem, tembar, parnok oset alirtem, külemi lokteper inyakertem, company asoshi asaya meyangertem aser supply asürtem dena liasü.
Marathon asemba ajanga asen temulung jangratemdaktsür aser asen nükjidong tongtettsü asoshi tali tashi ita kümdaktsür,” ta Wipro chief executive T.K. Kurien-i ashi.
Iba sentong ajanga sen kwi aatetar ibajibo parnoki ano memetetdaktsü.
Iba marathon ya Bengaluru, Chennai, Delhi, Hyderabad, Jaipur, Kochi, Mumbai aser Mysuru yimtitem nung kilometre 10 tasak nung asemtepdakja liasü.
Iba sentong ya ajanga asemteper jenti adokogo aser tarutsü nung junga training agir külen tesem aika nung asemtepa nung tokteptettsü.

You must be logged in to post a comment Login