Wisconsin nung police ka den nisung asem tepset

Weston, March 23 (Agencies) : Wisconsin anüdoklentip tsütsü bank ka nung mangatettep adokba sülen tesem asem tashi nung injang lendong ataloka police ketdangser ka den nisung asem asü. Iba tatalokba dak sendakba nung nisung ka pua lir, ta bushisüngdangertemi ashi.
Item lendongtem ya Bodhbar nikongdang bank ka nung, okatsür office ka aser apartment ka nung tasa atalok. Item tesemtem nung lendong agütsürtem aputsü asoshi ketdangsertem aser SWAT teloktemi mapang talangka mita ataba sülen nikongdang 5:00 meta nungi injang agi khateptsü tenzük.
Bodhbar nikongdang ketdangsertemi osangbenertem den senden tatsüka amenba mapang iba tatalokba dak sendakba nung temulung melemteti aliba nisung pezü indang osang tejangja kecha magütsü.
Parnoki, iba tesem nung joko lendong mataloktsü, ta ashi.
State Department of Justice’s Division of Criminal Investigation nung deputy administrator Jason Smith-i, iba tatalokba ketdangser 100 dak temai bushisüngdangdar anungji memunui osang tejangja metetdaktsütsü, ta ashi.
Green Bay nungi mile 90 shi pilar aliba Wausau anüolentip tsütsü aliba jila tila ka nung iba mangatettep adok. Police ketdangser tasüsangji Schofield aser Weston nung Everest Metro kübok police 27 agi akümba telen ka nung inyaker ka liasü.
Mezüngbuba injangji Rothschild nung aliba Marathon Savings Bank nung akha aser police tonga arudangbo nisung ana sür liasü.
Onok tonga arudangbo injang akhasangji jener liasü, ta police-i ashi.
Iba sülen minute 10 lir külen Schofield anasa Tlusty, Kennedy aser Dirks law firm na nungi phone ajanga item tesem nung injang akhaba osang ashi. Tasembuba injangji nikongdang 1:30 ako meta Weston nung aliba apartment ka nung akha.
Apartment nung alir arishi küm 21 tain, Kelly Hanson-i, ni nikongdang 1:15 ako meta kü kijiba nungi reprangzüka yokdang police gari ka aruyaa angu. Parnok arur second ishika lir külen injang ola angashi aser indangji police ketdangser ka laoba angu, ta ashi.
Lai, police ketdangser tangartemi injang agi yirur aliba police ji SWAT indang gari nung bener ao, ta osangbenertem dang ashi. Saka lai pa taküm aser tasü liasü ibajibo ashitsü mokoki liasü.