Wisconsin primaries: Cruz o Sanders nati temaba jenjang angu

Democratic yimtenren telok nungi US Tir menden asoshi candidate ama toktepsang, Senator Bernie Sanders-i Wisconsin nung takok anguba sülen Wisconsin kübok Laramie nung ayongba election nüboyimtsü sentong nung pa pusemertem den pelatepdang agiba noksa ka yangi angur. (Laramie, April 06)

Washington, April 06 (Agencies): US kübok Winsconsin state nung yashi, Mongolbar nü agiba US Tir menden atema candidate shimtsü election sentong nung Republican yimtenren telok nungi Ted Cruz aser Democratic telok nungi Bernie Sanders nati temaba jenjang anguba osang jangjaogo.
Cruz-i vote noklang nung shilem 52 ngua vote shilem 30 angusang, Donald Trump den temaba jenjang ngua par Republican telok candidate rong nung temaba jenjang angu aser Sanders-ia vote shilem 54 ngua vote shilem 47 angula, Hillary Clinton den temaba jenjang ngua par Democratic telok nung temaba jenjang ngua liasü.
“Ni tan Winconsin nung takok anguba ya kü jenjang tajungba küma melenshir lir,” ta Winconsin kübok Milwauke nung agiba election nüboyimtsü sentong nung Cruz-i metetdaktsü.
Democratic telok rong nunga, Sanders-i tan takok anguba ya par Democratic telok candidate shimtsü tetoktepba 7 nung Hillary madak 6 benbuba takok angur lir.
Cruz aser Sanders nati tan takok nguaka, iba jagi Trump aser Hillary na jenjang mejungi mekümdaktsüi aliba olen ka election mongintemia metetdaktsüogo.
Republican mesüra Democratic telok nungi US Tir menden atema election nung tokteptsü temeten angutsü asoshi candidate-temi par pusemer yimsüsür 1,237 shi angutsü nungdaker aser Trump-i pa pusemer 736 ngua pusemer 267 tashi ngua alisang, Cruz den tangasa temaba jenjang nung lir.
Hillary-ia yimsüsür 263 agi Sanders den pusemer timba ngua Democratic telok nungi temaba jenjang anguba osang jangjaogo.