Wladimir Klitschko joko metsüngteptsü

Berlin, August 03 (Agencies): Ukraine nunger boxer aser taoba World Heavyweight Champion, Wladimir Klitschko-i boxing nungi anener, ta Brehostibarnü sangdongogo aser iba ajanga November nung Britain nunger Anthony Joshua den tsüngteptsü teimla aliba samaogo.
Hamburg nung alisang arishi küm 41 tain, Klitschiko ya küm toku-ser tesadang heavyweight champion lia arur iba menden 2015 küm sama.
Klitschko ya 1996 Atlanta Olympic Games nung super-heavyweight gold angu aser 2006 nungi 2015 tashi shingaia mokokteti world champion den anu tanga belt aika bena aru aser küm ana tejaklen Britian nunger Tyson Fury-i points agi akok.
Klitschiko-i April ita nung tesüsa Joshua den WBA title asoshi London nung aliba Wembley Stadium nung tsüngtep aser round 11buba nung Joshua-i Klitschiko madak takok angu.
“Anthony Joshua den tesüsa tsüngtepba sülen iba telemtetba agitsü asoshi mapang talangka shisadang,” ta Klitschiko-i ashi. Klitschiko teti arishi küm 46 tain, Vitali ya taoba mapang World Heavyweight Boxing Champion lir.
“Boxing career nung ni mapang talangka takok nung alitsü meimla, nünok ajak dang kü indang temolung taroktiba nungi pelar,” ta pai sangdong ka nung ashi.
Klitschko-i boxing nung 64ben takok angu aser ponguben tamakok nung professional bout tembangogo. Item takok rongnung 54 bo knock-out ajanga akok.
“Ni bongmangba ajunga adalokogo, aser ni joko saisapong sülen kü indang tanabuba career tenzükner,” ta Klitschko-i video ajanga sangdong.
“Küm 27 süyiogo, ni iba lenmang nung jaja tenzük aser iba ya ni telemtetba agiba rongnung tajungtiba liasü. Ni iba lenmang shimtetba ajanga alima ajunga sema jajaogo, oshi aika angazükogo, shishilembaba tenzüktetogo, shisatsü nung jenjang tajung ngutetogo aser nüngdaka alibapurtem yariogo,” ta Klitschko-i ashi.
Klitschko ya hotel industry nung pa indang tia tendangtsü sentong lir aser pai Ukraine nung hotel tajung aika lapoka lir.