Wokha: 7 buba Inter-District Veteran Football Championship tenzükogo

Nagaland Treasuries & Accounts, Relief & Rehabilitation Advisor, Dr. T.M Lotha-i 7 buba Inter-District Veteran Football Championship asayamong tetenzükba asaya nung shilem agir asayartem den ajurutepba noksa nung angur. (Wokha, February 03)

Dimapur, February 03 (TYO): Yashi, Mongolbar nü nungi tenzüka 7 buba Inter-District Veteran Football Championship Wokha kübok local ground nung asayatsü tenzükogo.
Asayamong tenzükba sentong nung Nagaland Treasuries & Accounts & Relief & Rehabilitation Advisor, Dr. T.M Lotha tongti tesemdanger liasü.
“Saisapongtsü sabang nung shilem agitsü asoshi lanurtem ajungmesotsüsüa asayamong ayongba atema Nagaland Veterean Football Association (NVFA) den pelaba lemsateper. Saisapongtsü sempet alir lanurtemi temaba jenjang nung takok ngua shilem agitsüsa parnok anitettsü asoshi veteran-tem maneni ajungshir,” ta tongti tesemdanger-i metetdaktsü.
Saisapongtsü sempet alir lanurtem asoshi nungdakba saisapongtsü ki o jen renemtsütsü asoshi sorkari teinyakdak lir ta pai shisem.
Taruba Inter-Veteran District Football asayamong Phek District nung asayatsü sentong renemba osang ka NVFA Tir aser taoba DGP, Kire-ia metetdaktsü.
SDO (C) Wokha, Thavaseelan, IAS-ia District sorkar tenüng nung o jembia yashi sentong nung shilem agi.
Tan asayamong tenzükba asaya nung defending champions, Mokokchung teloki goal 3-0 agi Tuensang madak takok angu.
Peren, Phek, Dimapur aser Kohima nunger tsüngda asayaba asaya ajunga goal 0-0 draw nung tembanga liasü.