Wokha DC-i Govt. High School, Mekokla lapoktsüogo

March 17, 2017 nü Wokha Deputy Commissioner, Wezope Kenye-i tang tasen yangluba GHS, Mekokla lapoktsüba sülen ketdangsertem den külemi tangokba noksa ka angur. 

Dimapur, March 18 (TYO): March 17, 2017 nü Wokha Deputy Commissioner, Wezope Kenye-i tang tasen yangluba GHS, Mekokla lapoktsüogo.
Iba sentong lapoktsüdang DC-i iba school building takok ngua tembangtettsüsa shilem agir ajak nem tenüngsang agutsü.
Paisa Mekokla nung aliba nüburtem dang iba school ya pei meyong ama bilema junga anepalutsü ajungshi.
Paisa kaketshirtem dang, meranga azüngtsü aser senso tajung kaka akumtsü ayongzükba den külemi iba school nung azünger rongnungi lenir tajung aika adoktsü aser kenü anogobo iba tesem nung terenlok bener aruja tesem ajungkettsütsü imlar, ta ashi.
Paisa yimdaklirtem dang tekaraba nung Village council tentettsü aser yim tejakleni anir aotsü ajungshi.
Iba school nung Science, Maths aser Hindi tesayurtem maliba dak sendakba nung DC-i pai iba atema sorkar den jembitsü, iba den külemi department den asüngdangtepa tang atema lenmang ka bushitsütsü, ta nangzük.
Kasa sentong nung iba school building Contractor, Manthungo Kikon-ia school ki yangluba osang tatsüka metetdaktsü.
Rev. Dr.L.L.Kikon Mission & Evangelism Secretary-i iba school building meshiteta sarasademja liasü.