Wokha Deputy Commissioner den tepila sentong agi

Wokha, October 23 (TYO): Wokha Deputy Commissioner menden nungi anener, Dr. Manazir Jeelani Samoon, IAS den tepila sentong ka October 23, 2019 nü Town Hall, Wokha nung ayongzüka agiogo, ta ketdangsertem osang ka ajanga metetdaktsü.
Tepila o jembidang Dr.Manazir-i Head of Offices, subordinate Administrative Officers, NGOs aser staff temi pa tenzükba mapang nung pa den amalitepa inyakba atema pelaba lemsatep.
Paisa, pai küm ka ser ita 11 inyakdang elections asem junga agiogo aser Beti Bachao Beti Padhao kübok National awards asem nguogo, aser iba ya lokti tentet balaka aser nüburtemi yaritepaba ajanga lir, ta ashi.
DC-isa Wokha district-i ano tenüng tajung aika ajangzüktsü atema DC tasenba den-a maneni amalitepa inyaktsü ayongzük.
Deputy Commissioner tasenba, Orenthung Lotha, NCS-ia junga yimsüsütsü aser inyakyim teladak asütsü atema metetdaktsüba den külemi district ajungtsü atema Heads of Offices, lokti tentet balala aser Hohos nem pa den amalitepa inyakdaktsüner, ta mepishia metetdaktsü.
Iba sentong nung ADC HQ, ADC Bhandari, DB, staff, Lotha Hoho aser ketdangsertemi jembia liasü. Parnok ajaki Dr.Manazir-i district atema mapa tajung inyakba aser district tajung rongnung Wokha densemadaktsüba atema pa dang pelaba lemsatep.