Wokha District nung ango chanu lema agütsü

Dimapur, Luroi/August 13 (TYO): Department of Fisheries & Aquatic Resources-i Luroi/August 11, 2018 nü Wokha District nung alir ango metsür nem ango chanu lema agutsü.
District Fishery Officer, Sentinaro-i ango metsüba dak sendakba maparen tem indang ango metsürtem den lemsatepba mapang lai ashiba agi, shiruru metsümenaba ama ango metsüba nunga angoi achiba chiyongtsü aser chiyongtsü agütsüba yimya kanga tongtibang lir.
Lenmang tajungtiba nung ango züindaktsütsü atema ango nem chiyongtsü talila mesüra ajema magütsütsü atema ango metsür nem lai tetuyuba agütsü.
Sentinaro-i ashiba agi, Nagaland nung ango metsürtemi yimya ka ama teti dang ango nem chiyongtsü tim-i mesüra chiyongtsü talila anepalua magütsür, koba ajanga taginüba ama memetsütetter.
Ajiasünung, anogoshia ango nem chiyongtsü tatakzük anepalua agüja aser ango chiyongtsü tesem ka nung jung junga rizünga ayutsü atema laisa tetuyuba agütsü.
Item inyakyim ya ango metsürtem dang lemsatepba mapang laisa parnok dang ango metsüba yimya jung junga metetter külen ang inyaktsü atema tajungshiba agütsü. Iba den repsema Department of Fisheries & Aquatic Resources-i teti dang teyari agütsü atema renema dang lir ta, lai shisem.
Ano ango metsüba inyakyim tem tali metettsü atema Department nungi technical guidance agitsü atema ajungshi, aser ibaji ajanga ango metsür tem ajangzükba dang masü saka State nunga ango metsüba tali ajungketsü atema lir ta, Sentinaro-i ashi.
Ango chanu alemba sentong ya 2017-18 küm atema CSS Blue revolution kübok teyari ajanga ayongzüka kaogo. District Fishery officer Wokha, Sentinaro den külemi staff temi ango metsür nem ango chanu aguja liasü.