Wokha DPDB senden aser Khristmas jeli sentong agi

Wokha, December 11 (TYO): Ita shia amenba Wokha District Planning and Development Board senden December 10, 2019 nü Deputy Commissioner’s conference hall, Wokha nung Deputy Commissioner, Wokha leniba nung menogo, ta ketdangsertem osang ka ajanga metetdaktsü.
Iba senden nung Advisor Horticulture, Mhathung Yanthan aser MLA Dr. Chumben Murry nata aden.
Board-i Longsa Village nung (Arts Stream) Queen Mary’s College lapoktsü lemtet. District Evaluation Officer, Wokha-i power point ajanga par dept. osang mtetetdaktsüba sülen Chairman DPDB Wokha-i dept. dang district nung benoka inyakba schemes aser programmes balala junga asadangtsü mepishi. MLA Dr. Chumben Murry-i benokba nung ajemdaker Yanthan-isa district nung MNREGA kübok VDB maparen junga asadangtsü mepishia liasü.
Wokha district kübok shimba aspirational villages 4 atema action plan dak sendakba nung Chairman-i Office balala nung tekolakpurtemi benokba schemes aser programmes reprangshia liasü. Chairman-isa, item yim ‘adopt’ asüba nükjidongji parnok nem loktiliba aser rongsenkettsüng tsütsü tashi agütsütsü atema lir, ta ashi. Iba dak sendakba nung pai department ajak dang iba mapa takok angutsü atema asalentong ajak junga inyaktsü metetdaktsü.
Tesülen WTC nung DPDB züngsemtemi Witter Theological College, (WTC) Vankhosung den Khristmas jeli sentong agi.
Iba sentong nung tetushi tejaoker o jembidang Advisor, Horticulture & Border Affairs, Nagaland aser Chairman DPDB, Wokha, Mhathung Yanthan-i, nüburtem tenzüktsü aser district kübok maparen balala atema DPDB züngsemtemi peii akokba tashi ajak agi yaritepa inyakba atema pelaba metetdaktsü.
WTC-i shisaliok tsütsü terenlok kanga kaogo, ta shia Yanthan-i, mangdang aliba lenirtem kübok iba college-i ano nükjidong aika atongtsü imlar, ta ashi.
DC aser Vice Chairman DPDB, Orenthung Lotha-i, tangar taküm nung Khristmas taliba tetezü ketdaktsütsüsa amongtsü ayongzük.
Chairman, Board of Governors, WTC, Mhonchumo Erui, Associate Pastor, Kohima Lotha Baptist Church-i “Don’t miss Christmas” onük nung jembidang pai ajak dang pei melung nung Khrista sodaktsüba ajanga asen taküm nung Khrista aitdaktsütsü aser taküm nung Khrista tiyongtsü südaktsütsü ayongzük. Iba sentong nung WTC Principal, Dr. Moanungsang-i lokti pelaa agizük aser sentong tembanga carol aten, sempet melentep aser chiyunga tembang.