Wokha jila nung Suposhan Diwas seminar agi

January 31, 2019 nü Wokha jila nung Suposhan Diwas seminar sentong nung shisalen sayurtem aser shilem agirtem külemi tangokba noksa nung angur. 

Wokha, January 31 (TYO): January 31, 2019 nü Town Hall, Wokha nung Community base Event (CBE) kübok Beti Bachao Beti Padhao 2019 den senteper Suposhan Diwas awareness sentong ka agiogo, ta ketdangsertem osang ka ajanga metetdaktsü.
Iba sentong nung shisaalen sayurtemji Dr. Merebeni Odyuo, Sr. Dental Surgeon & DNO, NTCP, Dr. Khelitoli District Immunization Officer aser Sr. Supervisor, Erenbeni, CDPO nunger liasü,
‘Sensitization on the Harmful use of Tobacco’ onük nung jembidang Dr. Merebeni Odyuo-i, alima nung nisung jenti asüba kuli rongnung moko achiba densema lir, ta shia moko chiyungtsütem nung toxic substances lir, koba ajanga temang nung timtem agutsür, anungji moko machitsüla, ta ayongzük.
“Importance of Immunization & Institutional Deliveries” onük nung jembidang Dr. Khelitoli-i, hospital tem nung tanur asotsü atema anir aoba ajanga tanur junga sotetba dang masü saka tashidak jangjatsü aser teyari junga aguja anepalutsütsü; ibaji ajanga tanur asodang asüba ajema akumtsü, ta ashi.
Laisa, mozükidang tanur asoaba ajanga tanur kinü aser tetsü naprong junga anepoalutsü atema maongka angutsü, ta ashi.
Mapang shidak nung immunization aser vaccines agutsüba ajanga tanur ka tashidak aika nungi jenbutsü, ta shi alai tsürabur ajak dang sorkari agutsüba facilities agitsü aser mapang shidak nung tanur nem vaccines agutsütsü ajungshi.
CBE kübok Suposhan Diwas indang metetdaktsüdang Sr. Supervisor, Erenbeni-i, iba nükjidong ya awareness agutsütsü aser kinüngburtem dang tetsü aser tanur nutrition indang metetdaktsüba den külemi kibong nung tebnurtemi shialem agitsü aser kidang tanur yimyayimbong metetdaktsütsü atema lir, ta ashi.
Kasa sentong nung Jt. Secretary, Lotha Hoho, Yihamo Patton-ia o tatsüka jembia liasü.
Sentong nung Adolescent Girls Club Vongutchu Colony-i sobaliba tsüngsang ka ajanga shilem agi. Iba sentong ya EAC, Wokha Arhomo Yanthan leniba nung agi aser Mhalo Odyuo-i tepela anküp o jembia liasü.