Wokha, Kiphire aser Mon nung World Population day amung

Dimapur, Chiteni/July 11 (TYO): Alima ajunga den jangyu medema Wokha district nunga July 11 nü CMO conference hall nung Population & population stabilization fortnight mungogo. Iba sentong ya District health society Heath and Family Welfare-i ayongzük aser “Take responsibility towards family planning-prepare for wellbeing of mother and child” omen nung ajemdaker sentong agi.
Ojembiba mapang Dy. CMO, Wokha Dr. Zuben Kikon-i ashiba agi, iba anogo 1968 küm July 11 nü family planning ya International conference on human right sentong agiba mapang Human Right ka ta agizük. Tekübokba jenjang nung aliba aser yimdak yimtsüng nung aliba nüburtem dang kibong nung tanur aika sotenba ajanga nütsüngyongsük renloka aoer aser iba ajanga mapang manguba tebilemtsü, sensak tia aser tanga tebilemtsü aika bener arutsü ta angatetdaktsütsüla ta Kikon-i ashi.
Dr. Zuben-isa mazüng mashiba ajanga nütsüngyongsük tali renloka aoer ta ashiba den nütsüngyongsük tali renloka aoba nokdangtsü asoshi Family Planning inyakyim nüburtem nem angatetdaktsütsü ya kanga tongtibang ta ashi.
Iba sentong dak sendakba nung hopta ana tsüngda District Hospital aser Health Units tem nung family planning inyakyim; vasectomy, IUCD, PPIUCD, PAIUCD permanent aser temporary method, oral contraceptive pills alemtsü, condoms, ECP, family planning inyakyim nung angati counseling agütsütsü anungji nüburtemi iba maongka agitsü metetdaktsü.
Kasa mapang nung Kiphire nunga July 11 nü District Hospital Conference hall nung World Population day mungogo. Iba sentong nung EAC HQ Kiphire, Chumbenthung Murry alakteta tejaoker ka ama arua aden.
Chumbenthung Murry-i o jembiba mapang World Population Day ya küm shia July 11 nü amungba sentong ka lir koba ajanga alima netsüngyongsük tali renloka aoba agi tebilemtsü adokdaktsüba tem dak sendakba nung tangazükba balala agütsütsü meranger, ta ashi.
EAC-i ashiba agi, kibong tilala kümteta nütsüngyongsük tali küma aoba tebilemtsü bentettsü asoshi ajaki shilem agitsü mapang tongogo. Paisa, nütsüngyongsük tali akümba ajanga alima rongsen takaraba chimar koba lokti liyonga aotsü asoshi tebilemtsü tulu lir, ta ashi.
Sentong nung Dr. K. Pewezo Khalo DPO (RCH/UIP)-i tongti o jembi aser Atsali District Media Officer (NHM) District Hospital Kiphire-i tepela o jembia liasü. Iba sentong ya District Program Manager (NHM), Limawati lenisüba kübok aka.
Maneni Mon nunga District Hospital nung World Population Day 2019 mungogo. Iba sentong ya “Take Responsibility Towards Family Planning: Prepare for the Wellbeing of Mother and Child” omen nung ajemdaker agi.
Sentong nung alakteta jaoker SDO Mon, Chumlamo Humtsoe-i, family planning süoki ia agitsü ayongzük. Paisa, India nung nütsüngyongsük aika lir aser tang nüngdakba inyakyim kaji family planning lir ta ashi.
Sentong nung MO (Obs & Gyn), Dr.Aman Konyak-i ‘Take responsibility towards family planning; prepare for the wellbeing of Mother & Child’ onük nung ajemdaker jembi. DPO (UIP&RCH), Mon, Dr. Shasinle Tep-ia, Family Planning Schemes & services onük nung ajemdaker jembi. Lai ashiba agi, angati agi service agütsüba den family planning asoshi tejakleni aruba apuani nem sorkari teyari agütsür, ta ashi.
CMO Mon, Dr.Kechongol-i iba anogomung kechiba tongtibang iba indang jembia liasü aser Vincent Belho, General Manager, FPA India-i tepela o jembi.
Iba sentong ya National Health Mission, Department of Health & Family Welfare, Nagaland; Kohima kübok Chief Medical Officer, Mon aser Family Planning Association of Indian-i ayongzüka aka, ta ketdangser sangdong ajanga metetdaktsü.