Wokha nung 2buba LSU Cultural cum Literacy festival agiogo

Wokha, Rongjui/September 24, 2019 (TYO): Town Hall, Wokha nung September 23 Hombarnü District Administration-MSK (Beti Bachao Beti Padhao) & Wokha District Legal Services Authority den Lotha Students’ Union longjemer 2buba Cultural cum Literacy Festival sentong ayongzüka agia liasü.
Iba sentong ya “Shaping the Future Together through Culture and Identity” omen nung ajemdaker ayongzük, kong Jt. Director Agriculture, N. Jacob Yanthan tetushi tesemdanger aser Director of School Education, Wonthungo Tsopoe alaktetta jaoker ama aruagi dena liasü.
Lotha kin indang yimsü aser sobalibatem kaketshir/lanurtem dang lepshia metetdaktsütsü aser ajungshitsü mechi mapang agüja iba ama sentong tajung ayongzüktsüba asoshi Wonthungo Tsopoe-i Lotha Students Union nem tenüngsang agütsü aser iba den külemi, akhi tetsü-tebu mapang nungi amshia aruba sobaliba tajungtem tanü putu lanurtemi metsüngreta benshiyonga aotsü aser alima dang temaitsü ka ama sayutsü asoshi kanga dang nüngdaker ta pai ashi.
Paisa, akhi tetsü-tebu mapang pei jenjang dak apet sobaliba sübosülemtsü agiba indang yimya aser iba dak sendakba nung tongtibang onüktem rasa ashi.
Wonthungo-i, kaketshirtem dang wadang koba nung südir süaka, takok angur ka ka akümtsü asoshi ajungshia jembiba mapang, pai kaketshirtem dang tashi anga aser meranga inyaktsü asoshi mepishia liasü, kechiyong takok angutsü asoshi lenmang temela mali asünung südok- sünema kazüdang nungibo kaket shisatsü bushiba nungang mapang timba indoka aser lokti nung shilem tajung agir nisung akümtsü asoshi khuret bena alitsüla, ta kaketshirtem ayongzüka liasü.
Senotong nung Jt. Director, Agriculture, N. Jacob Yanthan-ia, kaketshirtem dang sobaliba jenjang angatetta amshitsü aser pei sobaliba mesamadaktsütsü atema kümzüka ayutsü aser yimya küma benshitsü asoshi tayongzükba agütsü.
Maneni, sentong nungsa Secretary (Judicial) Department of Justice and Law, Kohima, Nino Iralu aser SDO (C), Wokha Ajit Kumar Verma, IAS nati kaketshir/lanurtem ajungshia liasü.