Wokha nung International Girl Child Day mungogo

Dimapur, Mongputeni/October 11, 2019 (TYO): Beti Bachao Beti Padhao mapatong kübok Wokha District Administration-i Mahila Shakti Kendra (MSK) aser Saki-One Stop Centre (OSC), Wokha na den longjemer “Empowering Girls for a Brighter Tomorrow” omen nung ajemdaker October 11, 2019 Hokolbarnü Town Hall nung International Girl Child Day sentong ayongzüka liasü.
Sentong nung EAC, Wokha Molosangla Ozükum-i jembiba mapang lai ashiba agi, iba anogo ayongzüka amungba ya tetsür tanurtemi pei taküm nung ajangshiba timtem aser tayongzükba balala indang asadanga jembitsü nükjidong nung lir. Iba denji küelmi lai, tetsür nem tim shisaliok tangazükba agüja parnok nem tashi agütsübatem (empowerment) ajungkettsütsüji teinyaktsü tongtibang lir, ta ashi.
Iba olen nung ajemdaker laisa, lokti tejakleni anir aotsü mechi tetsür tanurtem anema mapa tamajung/teka sangshiba ajemdaktsütsü asoshi külem tebur teyari kanga dang nüngdaka kümogo, ta metetdakja liasü.
Asenok dak aliba tashi metettsü asoshi shisaliok kanga dang tongtibang lir, ta asüba olen nung ajemdaker, EAC, Wokha Molosangla Ozükum-i, tetsür tanur kija shia shisaliok angazüktsü asoshi temeden agüja lir aser parnok maitsüi mesüra mebendangi ajunshitsüla ta ashi.
Maneni, kasa sentong nung Advocate, Thungbeni Kikon, Case Worker, OSC-ia Girl Child’s Rights & protection onük nung ajemdaker jembi.
Iba sülen, Department of Health & Family Welfare, Dr.Thungchanbeni. S Patton-i Girl Child Health care & Personal Hygiene nung jembi.