Wokha nung Lotha Hoho küm 100 ajungba benjong amung

Dimapur, Yimpoksüi/Nov. 07 (TYO): Lotha Hoho küm 100 ajungba benjongmung Wokha nung November 6, 2023 nü “Chanting for Deliverance of Century’s Blessing” omen nung ajemdaker munga liasü. Iba sentong moaja Deputy Chief Minister, Nagaland. Yanthungo Patton den ano tejangja nübu aika dena liasü.

Patton-i iba sentong nung jembidang jubilee salem aben aser Lotha Hoho tenzüker aser tang teinyakdak puri anibelem mesasai Lotha nunger ajungtsü asoshi inyakba atema tenüngsang agüja liasü.

Lotha Hoho ya teimla milentong, sobaliba asodak aser Lotha nunger ola lir ta pai ashi. Küm noklang ka liyonga arudang temelenshi anguba pai pela agizüka liasü.

Lokti tentet balala takok ngua maparen inyaktsü asoshi nüburtemi yaritsü kanga tongtipang lir, ta pai ashi aser nüburtem dang iba alizüng ya maongka ama amshia mangatetep bentettsü aser adianu tanüla adokdaktsütsü ajungshia liasü. Paisa Lotha Tribal Council building ya heritage site ka ama wazüka ayutsü ashi.

Advisor, Agriculture, Mhathung Yanthan-i küm 100 ajungba tepela lemsatep aser Lotha nunger tebo-teti nungeri mangdang tajung ayuba ajanga iba jubilee mungteter ta ashi. Naga nunger asoshi Lotha nungeri shilem tajung agitsü nüngdaker, ta pai ashi aser hoho den yariteptsü aser amaliteptsü ajungshia liasü.

MLA Y. Mhonbemo Humtsoe-i temeim, temoatsü aser Lotha nunger tsüngta telungjem alitsü ayongzük aser ibaji ajanga yimchiyimjung alitsü ta ashi.

Kasa sentong nung MLA Achumbemo Kikon-i Naga nunger asoshi Wokha district kota tongtipang ta asüba indang onük nung jembi aser tejaklen repranga mangdang yur inyaktsü ayongzük.

Dr. Chumben Murry, Advisor to Chief Minister ajanga jembidang Lotha Tribal Council tenzükba mapang Lotha nunger lenirtemi tayongzükba balala ajangshiba indang bilemteta jembi aser küm 100 nung temelenshi balala bener arubqa indang jembi.

Lotha Hoho mendenpuba, Er. Mhondamo Ovung-i tarur pela agizükba o jembidang Lotha Hoho küm 100 ajungba benjongmung nung shilem agirtem dang pelaba lemsatepa liasü.

Lotha Officers Association indang tatong tir Khyopenthung Tsopoe-i Lotha nunger ainba aser terenlok nung tetsükdaktsü kecha magütsütsü ayongzük.

Iba sentong nung WTBC choir ajanga temeja ken ka aten. Iba sentong ya Dr. N Janbemo Humtsoe lenisüba kübok agi, kong Rev. Sankiluma Kikon, President, LBCA ajanga jubilee munger moaja sarasadem, Rev. Fr. John Ntonsi, Centre in-charge, St. Peters Catholic Church, Longsa ajanga sentong tenzüka sarasadema liasü.

Chief host ajanga jubilee souvenir sayatsü Rev. Nyanchumo Lotha, Executive Secretary, LBCA ajanga jubilee nüngshilong meshiteta sarasademtsü aser Y. Patton, Deputy Chief Minister, Nagaland ajanga semzükja liasü.