Wokha nung National Panchayat Day amung

Dimapur, April 16 (TYO): April 16, 2016 nü Dr. B.R Ambedkar sor küm 125 ajungba anogomung nüngtem nung Don Bosco Youth Centre, Wokha nung District Level National Panchayat day mungogo, iba sentong nung Treasuries & Accounts, Relief & Rehabilitation Advisor, Dr. T.M Lotha tongti tejaoker liasü.
Tongti tejaoker o jembidang T M Lotha-i, Dr BR Ambedkar-i linük atema inyaktsübatem indang metetdakja, akumli piyong pai lokti ajungkettsü atema inyak, ta ashi.
Paisa melungtet teloktem (NGOs) aser yimtsüng ketdangsertem dang nüburtem ajangzüktsü atema technology tasentem amshiba den külemi teyari balala aser maongka  agitsüla, ta ayongzük.
Iba sentong nungsa Project Director DRDA, Wokha, Thungdeno Mozhui, SDO PHED aser DWO Wokha, Zubemo Kikon nungeria RD schemes-MGNREGA/IAY/NRLM, Swach Bharat Mission aser National Social Assistance Programme (NSAP) indang jembia liasü.
Iba sentong ya Deputy Commissioner, Wokha,  A. Robin Lotha mendenbuba ser agi aser BDO, Sanis, Hamdok M. Konyak-i tepela anküp o jembia liasü.
Iba sentong ya Rural Development department aser Social Welfare department nati senteper ayongzüka liasü.