Wokha nung Plastic Waste Management sentong ka agi

May 14 nü Youth Centre, DBHSS Wokha nung Plastic Waste Management sentong agiba mapang ADC & Administrator WTC den ketdangsertem aser kaketshirtem tangokba noksa nung angur.

Dimapur, Monupii/May 14 (TYO): Swachh Bharat Mission kübok Wokha Town Council (WTC)-i May 14, 2019 nü Youth Centre, DBHSS Wokha nung Plastic Waste Management dak sendakba nung tangazükba balala agütsüba sentong ka ayongzüka kaogo.
ADC & Administrator WTC, Wokha Andrew C. Imti-i, o jembiba mapang Wokha jila kübok educational institution tem nem tangazükba balala agütsütsü nükjidong nung inter school Essay, painting competition aser poster campaign amala sentong ayongzüka agiba metetdaktsü. Paisa, plastic ya kanga dang tagidak aketba oset ka lir koba ajak len amshir, saka asenoki shisa kaa mamshira tsü mopung dak kongshir, ta shia kaketshirtem dang plastic mamshitsü mesera tajemba amshitsü atema nüburtem ajungshitsü mepeshi. Maneni paisa, Wokha Town Council-i yakta plastic bag aser plastic oset khen atema amshiba tem nokdangba osang agütsütsü, ta metetdaktsü.
Chief Team Metamorphosis, Thungdemo Kyong-i, plastic waste management dak sendakba nung jembidang, plastic amshiba ya kanga tayong lir saka asenok taküm aser alima tsü mopung nem timtem tulu bener arutsür ta ashi. Paisa, taküm aser tzü mopung tali meraksadaktsütsü atema plastic amshiba yimya junga asadangtsü asoshi nüngdakba lemsatep, koba ajanga teraksatsüba tulu bener arutsüadokogo.
Wokha EAC, Toking Yimchunger shibai iba sentong nung jembia liasü, pai kaketshirtem dang iba campaign/mission takok angutsü atema temelenshi bener arutsür kaka akümtsü aser alima temerekba kümdaktsütsü atema kümdangshitsü osang prokshitsü ajungshi.
Sentong nung tetoktepba balala agiba osang metetdaktsü aser ADC Wokha-i takokertem nem sempet agüja liasü. Painting tetoktepba nung Rendeno (Libemo Memorial School), Jeniren (Isaiah Ability School) aser Nzanrhoni (DBHSS) nungeri mezüngbuba, tanabuba aser tasembuba jenjang angu. Essay tetoktepba nung mezüngbuba jenjang Zujanbeni-i (Isaiah Ability School) angu aser Christina (LMS), Elisen (DBHSS) o Mhachan (LMS) nati tanabuba aser tasembuba jenjang angu. Kasa mapang nung Government Higher Secondary School, Wokha aser Libemo Memorial School na nem school temerektiba sempet agütsü.
Eastern Self Help Group puri sü agi yangluba yangku tem shishilembadang amshitsü asoshi temelen bag ama amshitsü atema sample agüja liasü. School tem dang iba amala yangkhu tarutsü nung yanglutsü ajungshi.
Iba sentong ya Wokha EAC Imtinungla Lonkumer lenisüba kübok aka aser DBHSS principal-i tepela anküp o jembia liasü, ta ketdangser sangdong ka ajanga metetdaktsü.