Wokha nung seminar ka aka

Wokha, Yimpoksüi/November 18 (TYO): Beti Bachao Beti Padhao sentong kübok District Administration-i, menstrual hygiene dak tali rangloker tetsür tem ajungkettsü asoshi anogo ka seminar Yimpoksüi/November 17 nü ayonga kaogo. Iba sentong ya Wokha, Town Hall nung aka aser sentong nung shisalen agütsür Dr. Nounenuo Terhase, Gynecologist aser Lotha Eloe Hoho taoba tir Mhonchumi Humtsoe na liasü.
Seminar nung o jembidang Wokha, Deputy Commissioner, Dr.Manazir Jeelani Samoon, IAS-i, tetsür tanurtem nem education agütsütsü asoshi nüngdakba tongtibangsa jembia liasü. Paisa, iba ajanga parnok nem tashi agütsütsü aser lokti nungiter kaka akümtsü, ta ashi.
Tetsür tanurtem ajungshitsü asoshi District Administration-i tawa Local Champion campaign sentong tenzükogo aser iba kübok kaketshisatsü bushiba aser tanga wadang nung takok tajung angurtem ajungkettsü asoshi District Administration-i jenjang tapet agitsü.
Sentong nung shisalen agütsüri menstrual hygiene shidak benshitsü nüngdakba lemsatepa liasü.
Lotha Eloe Hoho tir Zuchobeni-ia iba sentong nung o tatsüka jembia liasü. Adolescent Girls Group, Gilgal School Wokha puri jilunu ka ia liasü.
Iba sülen shisalen agütsürtem den sensaksema liasü aser sanitary pack tem lemtsü.
Iba sentong ya District Project Associate, NSDMA, Mercy Kithan lenisüba kübok aka aser SDO (C) Wokha, Chonpenthung Ezung-i tepela o jembia liasü.