Wokha nung Soil Health Card day sentong agi

Dimapur, Tsüklai/February 19 (TYO): ADC Wokha, K. Mhathung Tsanglao-i Mini Soil Testing kit aser Soil Health Cards scheme semzüktsüba mapang Department of Soil & Water Conservation-i ayongzüka February 19 nü Wokha Village Council Hall nung Soil Health Card day sentong ka ayonga agiogo.
Sentong nung o jembidang DC-i, iba scheme ajanga aluyimertem tsünüsenpongtsü tali adokdaktsüba nung teyari tulu agütsütsü, ta ashi. Paisa, aluyimertem dang tsünüsenpongtsü tali adokdaktsütsü asoshi parnok alu ayimba yimya melenshitsü ajungshi.
Scheme benokba mapang JSCO, Wokha, Nzanbeni Jami-i, iba scheme ya aluyimertem nem küm ana nung khen soil health cards agütsütsü nükjidong nung tenzük, koba ali nung temo samaa aoba tebilemtsü bentettsü asoshi lir, ta ashi.
Laisa, iba sceheme ya linük nung aluyimer ajak nem Soil Health Card agütsütsü asoshi State sorkar nem teyari agütsütsü atema tenzük. Iba ajanga aluyimertem nem parnok ali nung temo aliba indang metetdaktsür aser iba den ano ali temo terenlok asoshi lenmangtem sayur, ta ashi.
Maneni SCA, Yanpothung Jami-i sentepa aliba lokti dang kit amshiyim sayu. Iba sentong ya DSCO, Wokha, Litemo Murry lenisüba kübok agi aser Chumbemo Kikon-i tepela anküp o jembi.