Wokha nung Street Food Festival agi

Wokha, February 13 (TYO): State tesem ajak den liromedema SUDA kübok District Urban Development Agency, Wokha-i Health and Family Welfare kübok Food Safety, Wokha den ayongteper February 13 nü Police Point aser NST na nung Shehri Samridhi Utsav (Street Food Festival) ayongzüka agiogo, ta tanü district ketdangsertemi osang ka ajanga metetdaktsü.
Food stalls ji kasa mapang nung ADC & Administrator, Wokha Town Council, Mhathung Tsanglao aser EAC (HQ), Arhomo Yanthan nati tenzükja liasü.
Iba Festival nung SHGs 10-i shilem agia chiyungtsü aser aonsotsü balala ayok.
Iba sentong nung jembidang ADC-i SHGs dang mapang shia iba ama sentong ayongzüka agiba ajanga pei rongenkettsüng jenjang ajungkettsü ajungshi.
Paisa chiyungtsü ayokba maparen nung merükmeju alitsü, pei libajen merüka ayutsü aser plastic bags mamshitsü ajungshia liasü.
Iba sentong ya SHGs nem sabang agutsütsü atema ayongzük, iba denji külemi sensakertemi pei mapa balala sayatsü aser SHG züngsemtem nem lenmang lapoktsütsü nükjidong nung ayongzük.
Iba sentong ya Members Secretary, DUDA Wokha, Kiniholi aser Community Organiser, DUDA Wokha, Renbeni Odyuo na leniba nung agia liasü.