Wokha nung tenük surgery angati agitsüba sentong ka agi

Dimapur, March 30 (TYO): Wokha nung tenük surgery angati agütsüba aser mozü angati agütsüba sentong ka Dr. Motsuo Memorial District Hospital, Wokha nung March 27 nungi 30 tashi agi. Iba sentong ya National Programme for Control of Blindness, Nagaland (NPCB) teyari nung District Health Society, Dimapur ajanga ayongzük.
Ketdangser osang ka ajanga ashiba agi, tenük agi junga mangur nisung 232 iba sentong nung teyari balala agi aser parnok rongnungi nisung 30 bo tenük surgery angati agitsü. Parnok nem mozü aser nükrangtsü-a angati agütsü.
Iba sentong ya Wokha nung CMO, Dr. Enrithung Lotha aser Dr. Imna Pokyim lenisüba nung agi. Tenaprong ya tenük anepaluba nung takoktet lir, ta osang ajanga ashi.
Iba sentong nung teyari agütsütsü asoshi Dimapur District Hospital nung Dr. Imna Pokyim-i anir parnok trok oa camp nung aden. Iba sentong nung State Programme Officer NPCB, Dr. Ponsukui-a densema tongti shilem agi.
Iba sentong nung teyari agir dang doctor temi ashiba ama mapang shidak nung mozü achitsü aser parnoki ashiba ama inyaktsü asoshi Medical Surgeon, Wokha, Dr. Robin Lotha ajanga tetuyuba agütsü, ta ketdangser osang ajanga ashi.