Wokha nung tetsürtem nem COPTA Act seminar katsü

Dimapur, April 08 (TYO): March 08, 2017 nü LTC hall, Wokha nung District Tobacco Control Cell, Wokha aser Health & Family Welfare Department-i Tobacco & COPTA Act 2003 indang nung tetsürtem nem seminar ka ayongzüka katsüogo, aser iba sentong nung EAC (Judicial) Wokha, T.Kupa tongti tesemdanger liasü.
Iba sentong nung tongti tesemdanger o jembidang Kupa-i, nüburtem nem junga angatetdaktsüra moko achiba nokdangtettsü, ta ashiba den külemi moko achiba ajanga takoksatem indang nüburtem nem junga angatetdakjang, ta mepishi.
Okila jembidang District Nodal Officer, Wokha (NTCP), Dr. Merebini Odyuo-i, Nagaland nung nütsüng tesadang ka dang nungi tali (shilem 57)-i moko balala achir ta asuba ta shisabolutsü osang ka lir, ta ashi.
Odyuo-isa, GATS 2010 survey ajanga ashiba agi moko achir timba aliba state ji Mizoram sülenbo tanabuba jenjang nung Nagaland lir, ta metetdaktsü.
Lai ashiba agi, moko achiba tebilemtsü nokdangtsü atema mera aika agia inyakdar, talisa tobacco Control Laws ji COPTA 2003 ajanga benoker.
Tangbo nisung aikati moko indang meteta kümogo aser moko machiba tesemtem atema inyaker, ta laisa shisem.
Laisa, NTCP team, Wokha-i lokti nung moko achiba ajanga takoksatem metetaktsür, iba den külemi school 26 nung awareness programme katsüogo, iba den külemi Arogotem, jilatem aser anasa aliba yimtsüngtem nunga training aser sensitization programme katsü, aser maneni katsütsü sentong lir, ta metetdaktsü.
MO, Wokha, Dr. Pithungo Kikon-i ‘Tobacco & Women’s Health’ onük nung jembi aser Kimiri Tungoe (WDLSA) aser Abeni Kikon nati COPTA Act 2003 aser ‘Role of Women in society’ onük nung jembia liasü.
Iba sentong ya Mharoni Ezong leniba nung agi aser Ruutsome Savino-i tepela anküp o jembia liasü.