Wokha, Phek aser Pughoboto nung tenokdangba agütsür

Dimapur, Aenjeti 23 (TYO): Section.144/144A aser ECI totuyuba Vide NO.464/L&O/2007/PLN-1 nung ajemdaker Wokha District Magistrate, Manazir Jeelani Samoon-i Wokha district kübok nüburtem shingaia license aliba prangbong, süng, nok, Explosives (fire cracker amala) aser kotari bener mesenzütsü tenokdangba agütsü.
Election nung tokteptsüpur mesüra parnok agent tem mesüra political party temi District Magistrate nungi temelaba magie nüburtem meyong kiojen mesüra nüburtem kazüba tesem amala nung jara nung züluba, poster amaba, oset balala tereprangtsü raksatsüsa ayuba mesüra noksa mejepteta inokba, hoarding ayuba nungi nokdanger. Aonung 10:00 ako nungi anepdang 6:00 ako tsüngta PA/Loud Speakers system amshiba, kuli tejangja melie sen 50,000 dak tali bena aliba, arishi küm 16 nungi tema nisung mashi kati tejak majitettsüsa sübusolemer nüburtem mesüra nija aliba tesemtem nung nokdanger, ta kasa sangdong ajanga metetdaktsü.
Tang nungi tenzüka iba totuyuba ya Wokha district nung election result mesangdong tashi amshitsü, ta Wokha District Magistrate ajangasa metetdaktsü.
Iba totuyuba ya Election Commission of India (ECI) ajanga 13buba Nagaland Legislative Assembly atema General Election agitsü anogo lemtetja aliba nung ajemdaker aser Wokha District nung tang tensa asadanger agütsür, ta kasa sandong nung shia lir. Iba totuyuba ya General Election, 2018 mapang lendong timtem majurutsü, temzüng ozüng shidak amshitsü aser election süngjema tajungtiba nung agitettsü mechi agütsür, ta iba sangdong nung shisema lir.
Kasa tenokdangba ya Phek aser Pughoboto nunga agütsüogo.
Criminal Procedure Code, 1973 indang Section 144 (A) ajanga tashi agütsüba nung ajemdaker Phek district indang jurisdiction kübok 13buba Nagaland Legislative Assembly Election, 2018 yimjung nung agitsü mechi license aliba prangbong/nokonü amshitsü memelar, ta District Magistrate, Phek, Shanavas C, IAS-i sangdong ka nung metetdaktsü. Saka NDAL database atema anasatiba police station nung verification agitsü mesüra yutsütsü atema license aliba prangbong tem bena aliba bo iba tenokdangba nung madentsü, ta kasa sangdong nung shia lir.
Iba totuyuba ya tang nungi tenzüka election metembang tashi mapa küma amshitsü aser ‘arms’ ojang ya Indian Penal Code, 1860 indang Section 153AA nung alibatem asütsü, ta metetdaktsü.
Pughoboto ADC & DEO-ia ‘arms’ amshiba nung tenokdangba agütsü.
Election mapang nüburtem kümzüka aser yimjung nung election maparen inyaktettsü mechi ECI ajanga totuyuba agüja aliba nung ajemdaker Pughoboto Sub-Division nung nüburtemi license aliba prangbong aser nokonü amshiba nungi nokdanger, ta ADC & DEO, Pughoboto ajanga metetdaktsü.
Saka anasatiba nung aliba police station nung verification agitsü atema mesüra police station nung yutsütsü atema amshiba aser NDAL database atema amshiba licensed arms tem iba tenokdangba küboki maittsü, ta kasa sangdong nung shia lir.
Kasa totuyuba ya tang nungi tenzüka election matem tashi alitsü, ta sangdong nung shisema lir.