Wokha Town candidate temi tenüng meyipa agir

Dimapur, January 14 (TYO) : January 8, 2017 nü Lotha Public Resolution agizüka Wokha Town nung candidate aikati tenüng meyipa agitsü mulunga agizükogo.
January 14, 2017 nü Town Hall, Wokha nung Wokha jila nung public, temeket aliba yimtsüngtem nungi nisungtem aser Lotha nunger tongti telok ajak külem senden ka amen.
Nagaland nung ULBs election nung tokteptsü atema tenüng agüja alirtem meyipa agidaktsütsü indang maparen tenzüktsü atema sendenji amen aser iba mapang candidate aikati parnok tenüng meyipa agitsü mulunga lir ta telok dang ashi, ta Lotha Hoho mendenpurtemi sangdong ka nung metetdaktsü.
Ajisüaka, tanü ya Honibar anogo aser sorkar mapa meinyakba anogo ka asüba agi, Returning Officer indang office melapok, aser ibaji ajanga candidate temi office nungi tenüngbo magientet, saka senden nungjisa Independent candidate asemibo ‘Withdrawal Bond’ nung sign asü, ta sangdong nung shia lir.
Par asemji Zaremo Murry. Jangpongthung Ngullie aser Abel Ennio nungertem lir, ta sangdong nungsa metetdaktsü.
Tanüngba candidate temia tenüng meyipa agitsü ta nangzük aser N. Mhabemo Ezung-i NPF party candidate ajak tenüng nung parnok külemi tenüng meyipa agitsü ta nangzük.
Lotha Hoho den Lotha nunger public ajaki tenüng meyipa agiba candidate tem dang pelaba metetdaktsür aser tanüngba candidate temia tekaratiba nung tenüng meyipa agitsü ayongzüker, ta sangdong nung shia lir.
Lotha Hoho ajanga tenüng meyipa agitsü atema mapangji January 16, 2017 aonung 12:00 ako (ayaterm) tashi agütsür aser iba dak sendakba atema candidate temi mobile no 961205057 mesüra 9436078556 den tongteprateptsü akok, ta sangdong nungsa ashi.
Tanü senden nung adenertemisa January 8, 2017 nü telemtetba agia aliba ama, tenüng meyipa magiba candidate temi tarutsü nung timtem kar danga ajurura parnoki dang tebilemtsü abentsü, ta bangjemtep.
Lotha Hoho-i telemtetba agibatem rongnung, candidate temi tenüng meyipa magira, pa/la den amalitep malitsü, lokti nung shilem amgidaktsütsü, aser lennisüba maongka magütsütsü onüktem dena lir.