Woman Player of the Year sempet atema Saina tenüng benoker

Dubai, December 04 (Agencies): Alima ajunga nung badminton asayabaren ketdang asüba tentet, Badminton World Federation (BWF)-i kümshi agütsüba 2015 Woman Player of the Year Award atema India’er tetsür badminton asayar mongin, Saina Nehwal tenüng benokogo.
Saina-i taküm 2016 tsüngda tetsür World No. 1 akümer mezüngbuba India tsür akümba den külemi, lai Delhi nung ayongba BWF World Superseries takok marok agizük aser BWF World Championships, All England Open aser Thaihot China Open asayamong final tonga kanga junga shilem agiba ajiteta 2015 Woman Player of the Year sempet agütsütsü atema la tenüng benoker lir.
Tang tetsür World No. 2 jenjang abenla, Saina den külemi, World No. 1, Spain tsür, Carolina Marin; China tsür, Zhao Yunlei aser China tsürsa, Bao Yixin nunger tenünga iba sempet agizüktsü asoshi tenüng benokba asayar tarensen nung densema lir.
United Arab Emirates kübok Dubai nung asayatsü ayongba Dubai World Superseries Finals asayamong nung shilem agir asayartem pela agizüktsü asoshi tan December ita 7 nü ayongba sentong nung 2015 BWF Players of the Year Awards agizüker asayar tenüng metetdaktsütsü renema lir.