Women Cell, Dimapur-i nisung tepseter ka apu Gari nung yi shibelener aika apu

Dimapur, July 31 (TYO) : July 29, 2015 nü Women Cell, Dimapur-i Abdul Hakeem ta ser nisung ka apu.
Pa ya Assam kübok Naukhati yimer asür Harzat Ali’er jabaso lir aser hopta asem tejaklen pai Kerala nung tebutsü den ita asem tain jabaso tepseter Dimapur nung arua jenokba liasü.
Iba tatalokba sülen Perumbavoor Police Station, Ernakulam, Kerala-i pa aputsü bushia liasü aser Dimapur police-i pa apuba sülen teinyaktsütem inyaker pa Kerala Police ket nung agütsüogo, ta Addl.Dy. Commissioner of Police/PRO Dimapur-i Hokolbarnü sangdong ka nung metetdaktsü.
July 31, 2015 nü Women Cell, Dimapur-isa Purana Bazar nung Maruti Alto (B/R. No. AS01AQ-3956) nung yi case 10 bena aliba apu. Iba dak sendakba nung tetsür ka puogo asr bushisüngdang südar, ta sangdong nungsa shia lir.
Dimapur Police-i July 29, 2015 nü Mahindra Scorpio asem arishia aoba sülen Kushiabill anasa apu.
Police-i parnok arishia aoba agi gari nung mena alirtem jagi gari toktsür jena ao aser police-i garitem lapoka reprangdang yi tapu balala bottle 4330 bena aliba angu. Gari asem indang number ji NL06-2641, NL07-0627 aser NL03-1276 lir aser iba dak sendakba nung East Police Station nung ken o ka benokogo, ta sangdong nungsa shia lir.
Ano, July 21 nü Dimapur Police-i Hyundai i20 gari ka nung yi case 16 bena aliba apu. Iba dak sendakba nung Kuhoboto yimer Yekhato Yepthomi’er jabaso Nipato Yepthomi puogo aser West Police Station nung ken o ka benokogo.
Ano, July 18, 2015 nü Newfield Check Gate nung police-i garitem mita reprangdang Bolero gari ka nungi yi apu.
Bolero (B/R. No. NL10-9408) nungji yi tapu balala case 14 bena liasü aser iba dak sendakba nung Sangte Konyak aser Akum Yimchunger na pua lir, ta Dimapur Police sangdong nungsa metetdaktsüogo.