World Athletics: Bolt-i tasembuba gold medal agizüker

Beijing, August 29 (Agencies): Jamaica nunger toktepa asemer mongin, Usain Bolt-i par Jamaica relay team tenüng nung tan agi 4 buba 4x100m takokba tanü Honibar nü agizükogo.
Tang Beijing nung tasayadak world athletics championship asayamong tebur 100m aser 200m shilem na nung gold medal agizüksang, arishi küm 29 tain Bolt densemba relay teloki tanü minute 37 ser second 36 nung alizüng mezüng tonga gold medal agizüka liasü.
Bolt den toktepa asemsang, Justin Gatlin densemba US’er relay teloki tanabuba jenjang angu saka Tyson Gay aser Mike Rodgers nati tatemlen aibelenba yong par telok iba tetoktepba nungi agientsüsa aküm.
US telokji melenzüka, minute 38 ser second 01 nung alizüng atonger, China teloki silver aser Canada teloki minute 38 ser second 13 nung alizüng tonga bronze medal agizük.
Tanü Bolt den külemi shilem agir, Nesta Carter, Asafa Powell aser Nickel Ashmeade nungeri tan takok anguba ya par Jamaica linüki Olympics asayamong 2 densema alima ajunga nung ayongba tongti asayamong 6 buba nung relay gold medal atonga agizüker lir.
Taoba mapang, 2009 aser 2013 na nung ayongba world championships nung asemteptsü shilem indang gold 3 tashi agizüksang, Bolt-i tan agi world championship gold 11 buba agizüka otsü tasen ka yanglur lir.
Ano külen, Britain nunger Mo Farah-ia tebur 5,000m alizüng mezüng tonga gold medal tanü agizükba osang jangjaogo.
Taoba hopta tatembanglen tebur 10,000m gold agizüksang, arishi küm 32 tain Farah-i tanü minute 13 ser second 50.38 nung alizüng tonga tan agi 3 buba 5,000m gold agizüka otsü tasen yangluogo.
Kenya nunger Caleb Ndiku-i minute 13 ser second 51.75 nung alizüng tonga silver aser Ethiopia nunger Hagos Gebrhiwet-i minute 13 ser second 51.86 nung alizüng tonga bronze agizük.