World championship medal asemben angutsü merangtsü: PV Sindhu

New Delhi, August 9 (Agencies): World Badminton nung anaben tashi bronze medal angula, PV Sindhu-i tan Jakarta nung August 10 nungi 16 tashi ayonga aliba asayamung nung ano medal tasembenbuba angutsü tebilemba lir.
Tang tashi nung India nungi badminton asayar rongnung World medal ana ngua alilaji arishi küm 20 tain, Sindhu ang lir. Lai 2013 aser 2014 kümtem nung bronze medal ka ka ngua lir. Tasembuba medal ji tan Istora Senayan nung aliba court nung Mongulbar nü asayadang angutsü la teimla lir.
“Ni temang nung timtem kecha mali. Practice mapang kanga junga asayateter. Ni kü dak temulung alemer aser küm asembuba atonga-atonga medal ngutet nungbo kanga pelatsü,” ta World no 13, PV Sindhu-i interview ka nung ashi.
La ya mezüng round bo bye nung lir aser tanabuba round nung Danish Line Kjaersfeldt aser Irish Chloe Magee na tsüngda shibai kokdir iba denji asayatsü. Iba sülen China tsür Olympic champion, Li Xuerui den tasembuba round nung asayashitsü amai lir.
“Li Xuerui den asayashitsü amai asübaji ni meteta lir. La den asayatsüji kanga temelabo masü. Ajisüaka ni junga asayatettsü ta ni tamang akar. Ni iba ya asoshi kanga meranga practice asür,” ta Hyderabad tsür, Sindhu-i ashi.
Sindhu aser Xuerui na asemben tashi asayaba nung Sindhu-i khen dang koka lir.