World Championships: Kom o Sarita na 2 buba round tongogo

Astana, May 19 (Agencies): India’er tetsür tsüngteper mongin, MC Mary Kom aser külem sensotsür, L Sarita Devi nati takok ngua tang tasayadak AIBA World Women’s Boxing Championships 2 buba round-i tanü, Brehostibar nü iogo.
Taoba mapang World champion akümtsü jenjang 5 ben tashi ajangzükla, temang touzük seret 51 taret Kom-i points 3-0 agi Sweden tsür, Juliana Soderstrom 1 buba round nung tsükdaktsü.
Taoba Asian gold medallist, temang touzük seret 60 taret, Sarita-ia points 3-0 agi Belarus tsür, Ala Yarshevich madak takok ngua 2 buba round asayatsü jenjang angu.
India tenüng nung Olympic medal mezüngsüa agizüker tetsür tsüngteper, Kom-i Mongolia tsür, Nandintsetseg Myagmardulam madak takok angur, Germany tsür, Azize Nimani den tan Honibar nü tsüngteptsü lemzükogo.
Sarita-ia 1 buba round nung bye angula, Mexico tsür, Victoria Torres den toktepa tsüngteptsü lemzükba osang angazükogo.
Kom o Sarita naprongi tan asayamong nung takok anguba ajanga medal agizükba den külemi, taküm August ita 5 nü nungi tenzüka asayatsü ayongba Rio Olympics nung India tenüng nung shilem agitsü jenjang angutsü alizüng yua lir.
Tenaprongi tan asayamong nung tajemba agi semifinal asayatsü jenjang angu nung dang Rio Olympics nung shilem agitsü temeten angutsü.