World Championships: Sonia-i silver ang agizük

Astana, May 27 (Agencies): India’er tetsür tsüngteper, Sonia Lather-i final asaya nung tamakok ngua AIBA Women’s World Championships nung silver medal ang agizüktsüsa jenjang tanü, Hokolbar nü nguogo.
Italy tsür, Alessia Mesiano-i tanü points 2-1 agi Sonia madak temang touzük seret 57 taret shilem indang final asaya koka gold agizüka liasü.
Sonia-i tan final asaya nung takok ngua, gold agizükba ajanga India-i küm 6 shi nung tan mezüngsüa World Championships gold agizüktsü teimla tulu yua liasü saka lai tanü tamakok anguba ajanga iba mangdangji amajok akümtsüsa jenjang ajuruogo.
Arishi küm 24 tain Haryana tsür, Sonia-i tanü tamakok ajuruaka, lai tanabuba jenjang ngua India asoshi silver medal agizüktsür lir.
Manipur tsür, M C Mary Kom-i temang touzük seret 48 taret indang gold 2010 küm agizükba sülenbo India tsürtemi tanü tashi World Championships gold agizüka mali.