World Cup kokra Germany nunger asayar shia nem taa tali agütsütsü

Berlin, December 13 (Agencies): Germany nungi taruba küm Russia nung World Cup asayaba nung taoba küm temaba jenjang nguteta aliba takok marok ya tanaben agizüktetra, asayar shia nem sen euro 350,000 ($411,000) agütsütsü, ta linük indang football association, DFB-i Bodhbarnü metetdaktsü.
2014 küm Brazil nung World Cup asayaba Germany-i akokba mapang asayar shia nem sen euro 300,000 tali agüja liasü.
Coach Joachim Loew kübok iba team ajanga group stage nung asayadang akokba mesüra round of 16 atongba atema taa balaka magütsütsü, saka quarter-finals asayatsü jenjang nungtetra asayar shia nem sen euro 75,000 agütsütsü aser semi-final tongtetra sen euro 125,000 agütsütsü.
Iba football asayamung final nung tamakok anguyonga asayar shia nem sen euro 200,000 tali agütsütsü.
“Iba osang jelia metetdaktsüba ajanga asayartemi temulung agüja renemer asayatsü,” ta Germany team manager Oliver Bierhoff-i sangdong ka nung ashi.
“Asayartemi asayaba nung ajemdaker iba ama taa tali agütsüba ya yimya tajung ka lir,” ta pai shisem.
Russia nung asayaba mapang Germany-i kokra, Italy (1934-38) aser Brazil (1958-62) sülen Germany ya linük asembubai iba title adonga abener asütsü.
Taruba küm iba football asayamung nung Germany ya Group F nung Mexico, Sweden aser South Korea den lemzüka lir.