World Cup nung Team 48-i shilem agitsü: FIFA

Zurich, January 10 (Agencies): World Cup nung team 32-i shilem agia aliba ya 2026 nungi tenzüka team 48-i shilem agitsü asoshi iba asaya nung tekolakba telok FIFA-i Mongulbarnü renemogo.
Group stage nung team asem aliba group 16 alitsü asoshi FIFA Council ajanga lemtet.
“2026 World Cup nungi tenzüka team 48-i shilem agitsü aser group 16 nung team asemsem alitsü lemtetogo,” ta FIFA ajanga Twitter nung sangdong.
Sepp Blatter melena February nung FIFA president atema election agidang Gianni Infantino-i World Cup tali tuluba akümtsü asoshi nangzüka liasü.
Infantino-i tamasabo World Cup nung team 40-i shilem agitsü asoshi shia liasü saka October ita nung anu 8 bendenlok.
Iba asayamung nung shilem agitsüpur timba akumba ajanga iba asayamunga akhüm tamajungba akümtsü aser mapang tali talangba agitsü, ta jembiba o FIFA-i kecha telangzüba magütsü.
FIFA-i iba telemtetba agiba ya European club aser coach tajung aikati maginer.
Taoba World Cup, Brazil nung aliba ya küm 87 asaya aruba World Cup rongnung tajungtiba ka, ta alimai züngshir.