World Cup Qualifiers: Sunil Chhetri-i shilem magitettsüsa akümer

Tehran, March 23 (Agencies): Iran telok den asayatsü lemzükba 2018 FIFA World Cup qualifier asaya nung India nunger nungtugu football asayar, Sunil Chhetri-i India tenüng nung shilem magitettsüsa kümogo.
Asia nung tentetba football telok tarensen nung temaba jenjang abener Iran telok den asayatsü asoshi Tehran bushia apusoba jakdang Chhetri yiruba ajanga pai iba asaya nung shilem magitetsüsa akümba osang jangjaogo.
Chhetri-i shilem magitettsüsa akümba ajanga tang alima telok tarensen nung 160 buba jenjang nung alir, India telok nem takok ngudaktsütsü khuret Jeje Lalpekhlua-i abentsüsa jenjang ajurur lir.
Par Group D nung densemba telok rong nung teküboktiba jenjang nung alir, India teloki Iran den asayaba sülenbo qualifier asaya ka dang, Turkmenistan telok den tan March ita 29 nü India nung asayatsü lemzüka lir.
Tang FIFA rankings nung 44 buba jenjang nung alir, Iran den asayatsü lemzükba asaya nunga tamakok ngura, India teloki 2019 Asian Cup qualifier asaya nung joko toktepa shilem magitettsüsa jenjang tamajung ajurutsü.
“Iran den asayatsü lemzükba asayaji David o Goliath na ajuruteper ama asütsü kechiyong Iran ya Asia ajunga nung temaba jenjang nung aliba telok lir. Ajisüaka, ozü India teloki takok angutsü merangtsü,” ta India coach, Stephen Constantine-ia metetdaktsüogo.