World Cup Qualifiers: Sweden, Portugal aser Belgium-i kokogo

Tallinn, Estonia nung Belgium aser Estonia na tsüngda 2018 FIFA World Cup European qualifiers Group H asayaba mapang Estonia goalie, Mihkel Aksalu ball nokdangtsü atema joka atudang tangokba noksa nung angur.

June 10, 2017 (Agencies): Hokolbarnü Stockholm nung World Cup qualifier Sweden aser France na tsüngda asayaba nung Sweden-i 2-1 agi kokogo.
Asaya tenzüker minute 37 buba nung Olivier Giroud-i France pur atema mezüngbuba goal agütsü, ajisüaka winger Jimmy Durmaz-i minute 43 buba nung Sweden pur atema goal ka agüja score kasa aküm. Asaya nung France goal keeper Hugo Lloris-i aibelenba ajanga par telok goal tanabuba achi. Lloris-i box temai ball belenshia adoker Toivonen nem ball rakzükdaktsü aser iba sülen pai kecha aibelen mesüi goal agüja Sweden puri iba asaya akok. Iba takok ajanga Sweden pur Group A nung point 13 nguteta temaba jenjang nung France den külemi lir. Temetettsükaji telok ajak nungi temaba jenjang nung tembangba telok dang Russia nung World Cup nung shilem agitettsü.
“Hugo-i aibelenba ajanga onok-i iba asaya makok. Onok ano asaya 4 asayatsüba anunga lir anungji iba asayatem nung meranga asayaa onok nükjidong atongtsü merangtsü,” ta France coach Didier Deschamps-i ashi.
Maneni World Cup qualifier asaya tanga ka nung Belgium-i 2-0 agi Estonia madak takok ngua group H nung maneni parnok temaba jenjang nung lir.
Tallinn nung Hokolbarnü asaya nung Belgium pur atema Dries Mertens aser Nacer Chadli nati goal kaka agüja liasü. November ita Brussels nung iba linük ana tsüngda asaya nung Belgium-i goal 8-1 agi Estonia koka liasü.
Asaya nung asaya shilem mezüngbuba tatemi Artjom Dmitrijev-i Marouane Fellaini alangdaktsüba atema pa red card agüja asaya nungi togudaktsü.
Belgium pur parnok telok nung tanabuba jenjang nung aliba Greece dang nungi point 4 agi timba lir aser taruba küm World Cup nung shilem agitsü asoshi jenjang junga lir.
World Cup qualifiers tanga asaya ka nung Hokolbarnü Portugal-i 3-0 agi Latvia madak takok nguogo. Iba asaya nung Cristiano Ronaldo-i par telok atema gola ana agütsü. Pai tang tashi World Cup qualifiers asayaba nung goal 11 idakja lir.
Iba takok ya Portugal pur atema atonga 5buba takok asütsü. Parnoki Group B nung asaya 6 nungi point 15 nguteta lir, ajisüaka parnoki Switzerland pur point 3 agi memenepi tanabuba jenjang nung lir. Switzerland-i tang tashi nung khen danga tamakok ngua mali.
Assya nung Ronaldo-i tanabuba goal agütsüba sülen Andre Silva-i tasembuba goal agüja parnoki iba asaya ayong ayonga akok.