‘World Day against Trafficking in Persons’ anogo Dimapur nung amung

Dimapur, Chiteni/July 30 (TYO): Linük nung tanga tesemtem den jangyu medema Dimapur nunga ‘World Day against Trafficking in Persons’ anogo mungogo. Iba sentong ya Nagaland Baptist Church Council, Women department kübok Miqlat Ministry-i achaayanga “stronger together” omen nung ajemdaker Don Bosco Institute of Development & Leadership nung Mongolbarnü mungogo.
Sentong nung o jembirtem rongnung Tsepila Zhimomi, Youthnet, K ELa, Prodigals’ Home, Henlly Phom Odyuo, Journalist, Relo T Aye, ADCP, Crime, Gracy Aye, State Coordinator, State Resources Centre for Women aser Alole Tsuhah, Coordinator Miqlat ministry nunger densema liasü.
Sentong nung o jembirtemi ashiba agi, NGO balala aikati human trafficking anema raraa arudar saka tejashitsüka iba ya asen lima nunga ataloker. Tanur aika, talisa kinük nung aliba tesemtem nungi tanurtem shibelener aoer. Osang ajanga ashiba agi, ken o timba ka osang magütsüi dang süier.
Ojembirtemi, iba dak sendakba nung tangazükba balala grass root level nungi agütsütsü asoshi ayongzükba den local lokti tentettem dang pei yimtsüng nung tanur senzüsenpongba aser bendanger yimdaki aitba meita alitsü ajungshi.
Tanurtem aika kuli balala ajanga iba shibelenertem ket nung tsükogo ta ashiba den item tanurtem nem taküm liyonga aotsü asoshi trainings balala agütsütsüla ta parnokisa ashi.
Sentong nung taoba Asia pacific Baptist Federation general Rev. P Bonny Resu-i okila jembia liasü.