“World Food Day” nung chiyungtsü aangtsü ayongzüker

Dimapur, October 16 (TYO) : 1945 küm United Nations nung Food and Agriculture Organization (FAO) tentetba nüngtem nung kümshia October 16 nü World Food Day amunger.
Alima nung chiyungtsü agi anüngba malitsü nükjidong nung iba anogo amunger aser World Food Programme o International Fund for Agriculture Development nati anir food security dak sendakba telok aikati iba anogo tongtipang süa amunger.
1981 küm nungi World Food Day nung omen balala ayimokja amunger aser taküm asoshi omenji “Climate is changing, food and agriculture must too” lir, ta Director of Agriculture, Nagaland-i sangdong ka nung metetdaktsü.
2050 tashi nung alima nütsüng yongsük billion 9.6 akümtsü akok ta asadangteta lir aser iba asoshi tsünüsenbongtsü aser chiyungtsütem aika nüngdaktsüsa akümtsü aser tsüngsang mopung melenshiba ama tsünüsenbongbaren aser chiyungtsü dak sendakba mapa melenshia inyaktsüla.
Alima nung sensakertem rongnung sensaktibaji aluyimertemi lir aser parnok tsüngsang mopung melenshiba ajanga aiben takoksa ajurur. Iba asoshi FAO-i linük balala den kiset shiruru metsüba maparen tajungba akümtsü aser tsüngsang mopung melenshiba ajanga takoksa anguba ajema kümdaktsütsü asoshi mapa balala inyaker. 2050 tashi nung alima nung ayatzüra malitsü atema alizüng yua lir, anungji iba alizüng asoshi tayongzükba tulutibaji tsüngsang mopung melenshiba ya lir, ta sangdong nungsa shia lir.
Taküm omen ajanga tsünüteter aser tachir tsüngda tesentaktep tajung alitsü atema ayongzüker. Arem nung anguba chiyungtsü den asenoki tsünütetba chiyungtsü ajak asenoki kümzüka ayutsüla aser tsüngsang mopung melenshiba ajanga asenoki achiajemba yimya melenshitsüsa akümtsü. Anungji, nisung ajaki chiyungtsü wazüka ayutsü aser tsünüsenbongbaren timi inyaktsü atema merangtsüla aser iba osang ya prokshitsüla. Tanü alima nung nisung million 795 shi chiyungtsü peria mongui timtemer, anungji asenoki asen achiajemba yimya melenshitsüla, ta Director of Agriculture-isa ashi.