World Malaria Day nüngtem nung ‘Sanitation Drive’ ayongzüker

Dimapur, April 20 (TYO) : Kümshia April 25 nü World Malaria Day (WMD) amunger aser taküm asoshi omenji “End Malaria for Good” lir.

Iba dak sendakba nung National Vector Borne Disease Control Programme, Directorate of Health & Family Welfare-i district headquarter ajak kübok aliba kiyong/colony ajak nung Sanitation Drive ayongzüktsü.

Iba ‘Sanitation Drive’ indang omenji “Think.Plan.Create A Malaria Free Environment” lir aser sanitation drive tajungtem shimteta sempet agütsütsü.

Mezüngbuba jenjang takok angur nem sen 30,000, tanabuba nem sen 10,000 aser tasembuba nem sen 5,000 senpettem agütsütsü.

Kiyong/colony nung lanur teloktemi Sanitation Drive ketdangsüa inyaktsü aser iba tetoktepbaji jana endokdak yangluba, kilentzü aodak merüktetba, ongkentem yangluba aser tzü atsüngdendak tangbangba mapa nung ajemdaker takokertem shimtsü.

Iba mapa inyakba ajanga National Vector Borne Disease Control Programme-i lokti nung lipoküm meima sentong atongba tangatetba agütsütsü imlar aser ibaji ajanga malaria maliba alima akümtsü.