World T20: D/L yimya nung Pak tsürtemi India akok

New Delhi, March 19 (Agencies): Pakistan tsürtemi Duckworth/Lewis (D/L) yimya nung India tsürtem madak runs 2 agi tang tasayadak tetsür ICC World Twenty20 (T20) group league asaya tanü, Honibar nü kokogo.
India tsürtemi wicket 7 laoa runs 96 yangluba sülen overs 16 nung wicket 6 agia Pakistan telok nem runs 77 agüja alidang tzünglu kanga sashia aruba yong par asaya tum nung anenadoktsüsa aküm.
Iba mapang nung Pakistan tsürtem indang D/L par score 75 liasü aser ibaji ajanga Sana Mir-i aniba Pakistan tsürtemi  runs 2 agi India den temaba jenjang angutsüsa maongka tajung angu.
Tzünglu aruba jakdang Pakistan teloki takok angutsü asoshi ball 24 nung runs 20 yanglutsü nungdaka liasü saka tzünglu aruba sülen asayaji tanaben masayatettsüsa küma India tsürtemi tanü tamakok ajurutsüsa aküm.
Tzünglu amala mepaidoktettsüsa timtem ajuruba ajanga teshimtetba overs atazüktsüba cricket asaya tum nung anentsüsa akümdang tanabuba batting asür teloki takok angutsü asoshi nungdakba runs  tendangba yimya dang D/L yimya ta ajar.