World War II mapang tsükokba tayimtsü ka Roing nung ngutet

Kohima, Rongchii/April 04 (TYO): Arunachal Pradesh state kübok Roing district nung World War II mapang tsükokba US Air force aircraft ka Spear Corps sepaitemi ngutetta liasü, ta Defence Wing sangdong ajanga metetdaktsü.
Lower Dibang district nung alir lisopur trekker temi, tsükoker aliba tayimtsü ya mezüng angu aser parnoki police dang iba osang tejangja agütsüba sülen, osang nung ajemdaker iba tesem bushitsü atema Army special patrol yoka liasü.
Iba tesem ya Roing nungi km 30 shii pilar lir.
March 30, 2019 Honibarnü, Army patrol züngsem 12 aser police ka den iba maparen takok ngua inyaktet. Parnoki iba tesem ngutetba mapang tayimtsüji süngdonglidong aser rüjep süklep 5 shi agi meyibanger liasü. Iba mapang parnoki tesem nung jagi 1941 küm amshiba hatir tem ngutet aser tayimtsüji meraksatsüsa item hatirji kanga dang kümdanga agitet.
Tayimtsü tsükoka aliba tesem bushi aotsü atema Army patrol tem km 30 shi arem temelem aser rüjep agi meyibanger aliba tesem balala ajanga anogo 8 tashi senzü.
Tayimtsü tsükokba tesem ya arem temelem aser nübur aikati maoba ajanga taoba mapangtem nunga kari dang iba tesem tashi oa lir.
Akhidang amshiba tayimtsü aser raraba hatirtem ngutetba ajanga putiotsü kar kaktettsü imlar.
Iba osang dak sendakba nung ano talila bushisüngdangtsü atema Army patrol tem iba tesem asadanga liasü.