World War II nung rarar kati küm 70 sülen tedong ajuru

Sydney, Feb. 10 (Agencies): World War II nung rarar US nunger arishi küm 93 kati küm 70 dak tema sülen Bodhbarnü Australia nung tedong ajuruogo.
US nunger Norwood Thomas US, Virginia nungi Australia yimti, Adelaide tashi tayimtsü nung aruba sülen taoba mapang tedong arishi küm 88 Joyce Morris ajurua tena kanga pelatepogo.
Tena mezüng London nung ajurutepba mapang British tsür, Morris ji arishi küm 17 aiür ka liasü aser Thomas arishi küm 21 asangur liasü. WW II tembangba sülen pa US-i meyipa ao, aser tena shidi zülutepa arur Thomas-i Morris dang kibong akumtsü atema US-i arung ta ashi.
Ajisüaka Morris-i Thomas-i tetsür tangar ka dang angu südi ta bilema lai shidi züluba anen. Iba sülen tenaprong tangar den kibong akum. Thomas kinüngtsü 2001 küm süogo aser Morris o kinüngbu nata küm 30 lir palatok.
Yaküm Morris-i lar jabaso ka dang online nung Norwood Thomas tenüng reprangdangang ta ashiba sülen pa tenüngji Virginian-Pilot osangkaket ocet ka nung angu. Iba sülen tena social media, Skype ajanga ajurutep. Iba osang prokshiba sülen Thomas Australia-i aotsü atema nisung aikati pa nem senotsü teyari agüja liasü.
Tena Valentine’s Day (February 14, 2016) külemi amungtsü sentong lir.