World War II Peace Rally Jeep No. 2-i kokogo

World War II peace rally akokba team tangokba noksa nung angur.

Dimapur, Luchii/December 6 (TYO): Battle of Kohima bilemteta Luchii/Dec 6 nü Nagaland Adventure & Motor Sports Association (NAMSA) puri ayongzüka World War II Peace Rally kaogo. Iba rally ya Indira Gandhi Stadium, Kohima nungi tenzüka liasü.
Nagaland Chief Minister aser Festival Host, Neiphiu Rio-i sempet agütsüba sentong nung alakteta jaoker ka ama iba sentong nung shilem agitetba atema pelaba lemsatep. Pai ashiba agi, WW II peace rally ya iba tesem nung yimjung ajungkettsü asoshi aser tanga tesem nung aliba nüburtem dang asenoki yimjung aser tesunep meimba sayutsü nükjidong nung ayonger.
Paisa, WW II peace rally ya küm shia Hornbill festival mapang 2nd world war bilemteta amunger, koba asen lima nung rara tulutiba ka liasü ta asenoki jangjaa lir, ta ashi.
2nd World War ajanga Naga nunger puti otsü nungi maitoktettsüsa tasütu ka toktsüogo, kechiyong iba rara nung sepitem aika taküm laluba den yimdaklirtema aika taküm samaogo. Pai iba sentong nung shilem agirtem dang, linük nung yimjung ajungkettsü asoshi taruba kümtem nunga iba sentong nung shilem agitsü ajungshi. Paisa bendanglen nungi iba sentong nung shilem agirtem dang alima ajung nem WWII peace rally metetdaktsütsü asoshi sentong ayongertem den teka amteper inyaktsü ajungshi.
World War II Peace Rally ya küm shia NAMSA puri Hornbill festival mapang yimjung ajungketba den benjung tali jangratatemba kümdaktsütsü asoshi ayonga amunger.
Advisor NAMSA & Advisor to the Chief Minister of Nagaland, Abu Metha-i lokti tayongzükba o jembidang, state aser linük nung tesem balala nungi iba sentong nung shilem agitsü arubapurtem ajak dang pelaba lemsatep. Pai ashiba agi, WWII Peace Rally ya yimjung osang proktsü nükjidong nung Nagaland Chief Minister, Neiphiu Rio-i apitetba sentong ka lir. Paisa, England nung British Museum-i Battle of Kohima ya taoba aso nung allied forces-i raraba rara rongnung tongtibangtiba liasü ta jatsüba metetdakja liasü.
Maneni sempet agütsüba sentong Theja Meru lenisüba kübok aka. Assam Rifles puri Band display ka sayaa liasü aser parade commander, Moa Longkumer-i Battle report agütsü aser NAMSA, züngsem Kuputo Shohe-i tepela o jembia liasü.
Senpet angurtem yamai alitsü:
1. Most original vehicle (Most prestigious prize) Dimapur nungi Jeep no.2. Senpet sen 1,50,000/-
2. Best maintained vehicle; Meghalaya nungi Jeep no. 3. Senpet sen 70,000/-
3. Best Ladies Squad; Jeep no. 5. Senpet sen 30,000/-
4. Best uniformed Squad; Meghalaya nungi Jeep no. 3. Senpet sen 30,000/-
5. Best weaponry team; Jeep no. 6. Senpet sen 20,000/-
6. Best Tourism promotional team; Myanmar nungi Jeep no. 8 Senpet sen 20,000/-
7. Best disciplined squad; Jeep no. 7. Senpet sen 20,000/-
8. Best Scout of the day; Jowai nungi Jeep no. 4. Senpet sen 10,000/-
9. Most promising team; Kohima nungi Jeep no. 1 Senpet sen 10,000/-
WW II Peace Rally nung jeep ajak agi 12-i shilem agia liasü aser Jeep shia shilem agir nisung pezüzü liasü.