World War-II sülen Japan aser Naga nunger yimjung yangluogo

Kohima, November 28 (TYO): 1944 nung World War-II sülen küm 70 dak tema lir Naga aser Japan nunger tsüngda yimjung yangluogo.
Honibarnü Kohima nung Nagaland Baptist Church Council (NBCC) aser All Japan Revival Mission (ALRM) kübok telok anaprongla tsüngda tatok agütsütepogo.
April 4, 1944 nungi tenzüka World War II mapang Japan nungeri India amaktsü merang saka Kohima Rara nung parnoki tamakok angu.
Japan-Naga Reconciliation & Revival Summit ta tenüng agüja ayongzükba sentong ya All Japan Revival Mission (AJRM)-i ketdangsüa inyak aser Nagaland nung- Baptist, Pentecostal, Revival aser Assembly of God teloktem longjemer ayongzük.
Tanü Khedi Baptist Church nung agiba sentong nung World War-II nung shilem agir Khietso Pienyii aser Zhavise Vihienuo nati Naga nunger tenüng nung o jembi.
Tenati ashiba agi, Naga aser Japan nunger tsüngda aibelena tai tongloktsütepa aruogo aser mapang talangka lir külen süaka yimjung yangluba maparen inyakba atema tenüngsang agütsür.
“Naga nunger tantsü-tambutem aser WW-II Naga veteran tem ajak tenüng nung, onoki Japan nunger dang tai atokba ama onok nema tatok agütsüdaktsünür” ta Khietso aser Zhavise nati sentong nung metetdaktsü.
Iba sentong nung Japan nunger tenüng nung Senior Pastor Rev Jun Takimoto-i Naga nunger dang tatok meshi.
“Onoki iba mapa ya yakta inyaker alitsüba asü, kechiyong küm 71 tejaklen iba rara atalok, saka tangang onoki Naga nunger nem khuret aser timtem bener arutsüba atema sasa bilemer aser onok mulungjang taroktiba nungi tatok meshir” ta Rev Jun Takimoto-i ashi.
Sentong nung Nagaland Baptist Church Council (NBCC) general secretary, Rev Dr Zelhou Keyho-i Nagaland nung aliba arogotem tenüng nung o jembidang, iba anogo ta telok anaprong atema kanga dang tongtipang lir kechiyong asenok tatok meshiteptsü aser tesentaktep yanglushitsü atema adenshia lir, ta ashi.
Nagaland Legislative Assembly Speaker, Chotisuh Sazo-ia state sorkar tenüng nung o jembidang, Naga aser Japan nunger tsüngda tatok agütsüteptsü aser yimjung yanglutsü atema mapang tajung sempettsüogo, ta ashi.
“Nagaland ya Yisu Khrista osangtajung sangdongtsü atema tongtipang tesem ka nung lir. Onok anüdoklen Hindu nungeri, anüolentip tsütsü Muslim nungeri, anüdoklentip tsütsü Buddhist nungeri aser anüolen tsütsü tammang nung alirtemi meketbanga lir. Onoki Tsüngrem asoshi wadang inyaktsü jenti lir,” ta Chotisuh Sazo-isa ashi.
Sentong nung mendenji Rev. Rachülie liasü, First Assembly of God Church Kohima Senior Pastor, Rev. T R Angami-i Lai zünga sarasadem aser AJRM Rev Dr Paul K Ariga-i Tsüngrem o jembi.
Khedi Baptist Church nung agiba sentong nungsa Pheluopfhelie Kesiezie-i tesentepertem pela agizük aser Nagaland Chamber Choir o NCRC Choir, Pezielietsie nunger ken aten.
Iba sentong nung adentsü atema Japan nunger 26 den Thailan nunger 6 Kohima nung arua lir.
Asüng (Deobar) nikongtsütsü 3:00 ako nungi NBCC Convention Hall nung revival meeting alitsü aser iba sentong nung Nagaland Chief Minister TR Zeliang-i salem osang abentsü.