Wrestling Champion, Chyna arishi küm 45 nung süogo

April 21, 2016: Taoba mapang WWE wrestler aser reality television personality, Chyna mozü achiba aser shisatsü nung timtema aruba sülen Bodhbarnü (April 20, 2016) ajungbena arishi küm 45 nung alima nungi pilaogo, ta twitter osang ka ajanga metetdaktsü.

Lai 1990s mapang “Royal Rumble” aser “King of the Ring” nung melangtepa liasü, aser lai WWE Championship-a nguogo. La yashi Redondo Beach, California nung lar kidang sür angu.

La sapurtem dang iba osang sangdonga lar manager, Felix-i la indang Twitter page ajanga, “Aseni sapur ka aser nüngtugu nisung ka süogo ta tanü ni nenok dang kanga nemjema metetdaktsür. Alima nung tesüngmangtsü rongnung jenjang 9buba nung alila, Joanie Laurer, shiba dang Chyna ta ajar, la alima nungi pilaogo. La sapur million aika aser la meimer ajak melungjang nung la teti alitsü,” ta metetdaktsü.

Tawa Chyna Japan nungi kidangi shilanga liasü, kong lai English sayua liasü. Anogo aika lar medemertemi la dangi phone süaka lai magizüki liasü.

La kechi ajanga asü’ar kuli tejangja memetet. Ajisüaka tan hopta lai ‘fresh food delivery’ ka tenzüktsü atema sangdongba video ka nung la temang manemi ali asü (?) ta tasüngdangba liasü, kechiyong lai o jembibaji reptak-reptaka jembi aser tenüka pisür liasü.

La mapang ka nungbo temesepba mozü aser yi ajemba tebilemtsü kanga liasü, iba den külemi la shisatsü nunga timtem liasü. 2010 küm nunga lai mejangtsü mozü tali achiba ajanga timtem tulu ka adok aser la asüba mapang nunga lai shisa mebulutsü aser amoi aotsü mozü techitak liasü südi ta bilemer.

Chyna ya 1990s mapang World Wrestling Entertainment star ka akum, iba sülen lai film tem nung shilem agiogo.

Laisa VH1 indang “Surreal Life” aser “Celebrity Rehab with Dr. Dre” densema reality television shows aika nung shilem agia aruogo.