WRPO-i Tokhu Emong amongtsü

Dimapur, November 05 (TYO): Wozhuro Range Public Organisation (WRPO)-i November 6-7 anogotem nung Wozhuro Mimi Stadium nung Lotha nunger tongti benjung, Tokhu Emong ayongzüka amongtsü, ta tayongertemi tanü sangdong ka nung metetdaktsü.
Iba benjungmong nung indigenous Tokhu tetoktepba balala alitsü, aser item rongnung sobaliba yar tsüngsang aser ken, mi apoba, nü tsüloktsüba, lijak khashishiba, arr atsüatepba, aou talaki tutepba, sobaliba yimya nung ang-ainba densema lir.
Iba dak alia sobaliba sobutsü tetoktepba sentonga akatsü aser tetoktepba telemsa balala ajak nung sempet tajung agütsütsü.
Benjungmong sentong nungsa Commissioner & Secretary to the Government of Nagaland, A.Wopen Lotha-i November 7, 2017 nü career guidance indang kaket ka sayatsütsü.
Ajak den Tokhu benjung salem osang lemsatepba den külemi iba sentong ayonger committee, WRPO Tokhu 2017-i Wozhuro Range dang iba benjungmong nung adenba ajanga Tokhu temoatsü agitsü ayongzüker, ta metetdaktsü.